حنان في دعوى تمكين: رماني أنا والعيال عشان يتجوز في الشقة
معاملة جافة مليئة بالقسوة اعتمدها الزوج من بداية الزواج مع زوجته ومع ذلك لم تفكر في الانفصال من أجل الحفاظ على عش الزوجية خصوصًا بعد إنجابها لأولادها الثلاثة، ولكن لم يقدر الزوج تحمل الزوجة له طوال سنوات الزواج قرر طردها هي وأولاده بدون رحمة لأنه يريد الزواج من أخرى.
"مستحملاه بالعافية عشان خاطر العيال".. بهذه العبارة استهلت حنان حديثها وهي تروي قصتها للقاضي، مؤكدة على معاملته غير الآدمية لها من بداية الزواج ولكنها كانت تحافظ على عشهما الزوجي من الخراب ولم تفكر في الانفصال خصوصًا بعد ما أنجبت الثلاثة أولاد.
تابعت حنان: من أول أسبوع في الجواز وهو معاملته معايا مش كويسة خالص وكنت بقول هعدي يمكن عشان لسه في الأول وعشان لسه مش متفاهمين وكنت بعدي عادي وحتى لما بروح عن أهلي كانوا بيقولوا لي على كلنا كنا كدا في الأول".
استرجعت حنان معاملته لها طوال فترة الخطوبة وقالت: "طول فترة الخطوبة وهو بيعاملني أحسن معاملة وطول فترة الخطوبة عمره ما زعلني وأي حاجة بقولها بيعملها لي وهو مبسوط وحتى لو اتخانقنا كان بيصالحني على طول لأنه مبيستحملش يشوفني مضايقة أو زعلانة".
محاولات الزوجة في التأقلم مع زوجها
صبرت الزوجة على قدرها لعل الزوج يتغير معها ولكنه كان يتمادى في معاملته الغير آدمية لها، انجبت الزوجة ثلاثة أولاد وكانت تظن أن معاملته معهم تكون أفضل منها ولكن للأسف لن يتغير ومع ذلك كانت تحاول التأقلم من أجل الحفاظ على عش الزوجية، ولكن جاءت المفاجأة التي جعلتها تفكر في خطوة الانفصال دون تردد.
أضافت: "عمري ما طلبت منه الطلاق ولا مرة وكنت باجي على نفسي وعلى العيال عشان أحافظ على البيت، بس هو كان بيزيد في معاملته اللي زي الزفت وكنت برضو بعدي بس اللي خلاني أفكر في الطلاق بجد المرة دي إنه قالي إنه عايز يتجوز".
طردني أنا والعيال عشان يتجوز في الشقة
أكملت حنان: "كنت بحسبه بيهزر بس اتأكدت إنه مبيهزرش لما لقيته عايز يطردني عشان يتجوز في الشقة اللي قاعدة فيها أنا وعياله، قلت العيال مش هتهون عليه بس صحيت في يوم لقيته بيلم لي هدومي وهدوم العيال وبيقول لي روحي عند بيت أبوكي عشان خلاص هتجوز هنا".
لجأت الزوجة لـ محكمة الأسرة ورفع دعوى تمكين على زوجها بسبب رغبته في طردها هي والأولاد من أجل أنه يريد الزواج في عشهما الزوجي، ولا تزال القضية منظورة في المحكمة حتى الآن.