سحر في دعوى طلاق: فاكر نفسه سي السيد ودايما كاسفني قدام الناس
دعوى طلاق لجأت إليها «سحر» بعدما اكتشفت شخصية زوجها الحقيقة بعد الزواج الذي لا يعترف بوجودها أمام أي أحد، على الجانب الأخر حاولت الزوجة التأقلم مرات عديدة على هذا الأسلوب ولكنها فشلت وأدركت أنها لا تريد أن تكمل حياتها وهي تنساق وراء رأيه ما جعلها تفكر في الانفصال وترفع دعوى طلاق لتعيش دون قيود مع رجل اعتاد إهانتها.
«فاكر نفسه سي السيد».. هذه الكلمات الأولى لسحر وهي تروي قصتها للقاضي، مؤكدة على تحوله لمفاجئ من بداية الزواج وأنه غير الذي عرفته في البداية، أضافت: "في الخطوبة كان بيعاملني أحسن معاملة وكنا بنتناقش في أي موضوع براحة لحد ما نوصل لحل، كان متفهم ودي كانت أكتر حاجة كانت عجباني فيه حتى موضوع الشغل في الأول مكنش موافق إني اشتغل بس لما قعدنا واتكلمنا اقتنع وسابني انزل الشغل عادي".
قعدني من الشغل غصب عني
تابعت: «كنت مبسوطة إن ربنا رزقني بحد متفهم مش عصبي ولا بيحب رأيه هو اللي يمشي، فرحتي مكملش ويدوب اتجوزنا لقيت واحد تاني خالص غير اللي أنا أعرفه، مكنتش مصدقاه في الأول وقلت دي أكيد فترة أو ضغط شغل عشان معاملته معايا اتغيرت خالص وبقا واحد تاني غير اللي كان بيتعامل معايا في الخطوبة».
تعجبت الزوجة من أسلوب الزوج الذي يتغير بطريقة مفاجأة بعد الزواج دون أي مقدمات، فكانت تظن أنها فترة مؤقتة أو مجرد ضغوطات في العمل ولكنها اتضحت أنه أسلوبه الدائم، ما دفعها تفكر في الانفصال جديًا بعدما فشلت كل محاولاتها في التأقلم معه.
أكملت سحر حديثها: «من أول ما اتجوزنا وهو حد تاني خالص غير اللي عرفته وغير معاملته معايا في الخطوبة، بقى كل ما أجي أكلمه في أي حاجة يتعصب علي ويقول لي إنت مبتفهميش حاجة، حتى الشغل اللي كان موافق عليه عادي قبل الجواز فجأة مبقاش عايزني اشتغل وبقينا نتخانق كل يوم أنا نازلة الشغل لحد ما قعدت خالص».
دعوى طلاق بعد فشل كل المحاولات في التأقلم
أضافت الزوجة: «أسلوبه بقى لا يطاق بجد ومبقاش معتبرني موجودة ولا بقا ياخد رأيي في أي حاجة وعلى طول يكسفني قدام الناس، أخر مرة كنا عند أمه وكنا بنتكلم في موضوع وقالي انتي ملكيش دعوة بحاجة، مبقتش قادرة استحمل أسلوبه دا معايا، ومبقاش عايزني أقول رأيي في أي حاجة عايزني أقوله نعم وبس من غير ما أناقشه في أي حاجة».
لجأت سحر لمحكمة الأسرة ورفع دعوى طلاق على زوجها بعد فشلها في التأقلم مع زوجها الذي يتعامل على أساس إنه سي السيد لا يريد مناقشته في أي قرار، لذلك رفعت «سحر» دعوى طلاق منذ 3 شهولا ولا تزال القضية منظورة في المحكمة حتى الآن.
تابع أحدث الأخبار عبر
