عزة في دعوى خلع: أول لما عرف إني هخلعه طلع علي سمعة إني بكلم رجالة
دعوى خلع لجأت إليها "عزة" بعد معاناة سنتين مع زوجها بسبب ضربه وإهانته لها طوال الوقت منذ بداية الزواج وفشلت كل محاولاتها لإصلاح العلاقة وأصبحت لا تريد شيء سوى الانفصال عنه والذهاب بعيدًا، فكانت تظن الزوجة أنها عندما تلجأ لـ محكمة الأسرة وترفع دعوى خلع أن الزوج يتعظ ويتركها في حالها ولكنه تمادى في المشكلات.
فرحة البدايات
"مطلع علي سمعة زي الزفت" كانت هذه الكلمات الأولى لعزة التي بدأت تروي قصتها، مؤكدة على حياتها التعيسة التي كانت تعاني منها مع زوجها بسبب تعاطيه المخدرات، أضافت: "كان جارنا معانا في المنطقة جه اتقدم لي وأهلي شافوا إنه حد كويس ومحترم ووافقوا عليه واتخطبنا وطول فترة الخطوبة وهو كان كويس معايا الصراحة حبيته من معاملته لي".
تابعت عزة: "فضلت طول فترة الخطوبة كويس جدًا معايا واتفائلت وقلت ربنا رزقني براجل محترم وهيعيشني مبسوطة، اتجوزنا وهنا أخدت صدمة عمري فيه بعد ما كشفته على حقيقته".
صدمة الزوجة في الأشهر الأولى
أخذت عزة صدمة عمرها في زوجها في الأشهر الأولى من الزواج بعد أن اكتشفت شخص أخر غير الذي عرفته في الخطوبة، أضافت: "اتجوزنا وقلت هيعيشني مبسوطة عشان كنت شايفاه في الخطوبة راجل محترم وبيحبني، بس اتفاجئت بيه في أول الجواز لقيت واحد تاني معرفهوش، اتغير في المعاملة وبقى على طول عصبي".
الزوجة تابعت: "بقى كل ما نتخانق يضربني ويعمل خناقة كبيرة في الشارع والجيران على طول تلحقني منه، غضبت عند أهلي كتير وأهلي قالوا له يا تتعدل يا نخليها تتطلق قال لا هتعدل وهتغير ومش هعمل حاجة تزعلها تاني".
دعوى خلع
ظنت الزوجة أنه يتغير للأحسن ولكنه للأسف تغير للأسوأ وتمادى في ضربه وإهانتها لها ما دفعها للجوء لرفع دعوى خلع، أكملت عزة حديثها: "كنت فاكراه هيتعدل ورجعت له على أساس كدا بس لقيت مفيش حاجة اتغيرت بالعكس زاد في ضربه لي وكل شوية خناقات في الشارع وقلة قيمة".
تابعت: "زهقت وقررت اتطلق لما عرفت إن مفيش فايدة فيه وسبت البيت وطلبت منه الطلاق بس هو رفض، روحت رفعت قضية خلع بقالي شهرين ومستنية الحكم".
انهت الزوجة حديثها: "كنت فاكرة لما يعرف إن رفعت قضية خلع هخلص منه ويسيبني في حالي بس المشاكل زادت وبقى يجي الشغل يعمل لي مشاكل هناك وطلع علي سمعة في المنطقة إني مش كويسة وبكلم رجالة".