أخبار محكمة الأسرة اليوم
حظي وحش في الجواز.. محكمة الأسرة.. نهى: كل 7 سنين اتطلق
كانت دعوى في محكمة الأسرة هي نهاية «نهى» بعد زيجتين انتهت كل منهم فقط بعد 7 سنوات، المرة الأولى بسبب حالة الزوج العقلية، والمرة الثانية بسبب إهمال الزوج وأخلاقه السيئة، ولجأت الزوجة لمحكمة الأسرة حتى تحصل حقوق أبنائها.
قصص محكمة الأسرة.. اتجوزت أول مرة بعد 24 يوم
بدأت «نهى» حديثها وقالت: «أنا اتجوزت أول مرة من 7 سنين، مكنتش أعرف جوزي كويس قبل الجواز كان جاري حد جابهولي واتقدملي وسألنا عليه وطلع كويس، واتجوزنا على طول بعد 24 يوم بس بعد ما جهزنا البيت، خلفت منه بنت واحدة بس».
دعاوي محكمة الأسرة..بني أدم مش طبيعي
أكملت حديثها قائلة: «جوزي الأول كان بني أدم مش طبيعي، مريض نفسي بيجيله تهيؤات وبيكلم نفسه وعنده وسواس قهري، مكنش يبان عليه حاجة قبل كدة لما اتجوزته بان عليه، فضلت معاه 7 سنين وفي الأخر أعصابي تعبت منه كان بيضرب أي حد يجي جنبه، وطول الوقت بيزعق ويشتم لما لاقيته عامل كدة قررت اسيبه واتطلقت منه وخدت بنتي وعيشت مع أهلي».
حكايات محكمة الأسرة.. معتمد عليا أصرف عليه
تابعت حديثها قائلة: «جوازتي التانية كان واحد عرفته عن طريق واحدة صاحبتي، وكان جواز عن حب، معايا منه ولدين، في الأول برضوا كان كويس جدا ومحترم ومفيش مشاكل، بس من سنة اتعوج وبقى مش عايز لا على بيته ولا ولاده ولا أي حاجة تخص البيت ومعتمد عليا أنا بشتغل وأصرف».
قضايا محكمة الأسرة..مش بتاع مسؤولية
أنهت الزوجة حديثها قائلة: «حاولت مع جوزي التاني إنه يتعدل ويبقى كويس عشان مطلقش تاني لكن مفي فايدة كل ما أطلب منه فلوس يتعصب ويزعق، لحد أخر مشكلة ضربني طلع مش بتاع مسؤولية قليل الادب ومجرم ولسانه طويل، قعدت معاه 7 سنين زي جوزي الأول، وجيت المحكمة أرفع عليه قضية نفقة لأنه هربان ومبيسألش في بيته ولا أولاده».
تابع أحدث الأخبار عبر
