أخبار محكمة الأسرة اليوم
ساب البنات وسافر .. هيام في محكمة الأسرة: مهاجر بره عشان يجوعنا
عاشت «هيام» حياة صعبة بسبب زوجها الذي لم يكفي احتياجاتها هي وأطفالها منذ زواجها منه وتركها تستلف من الجيران معظم حياتها، وعاش هو حياته بأمواله ولم يسأل على زوجته وبناته، تحملت الزوجة حتى لا تدمر أسرتها لكن عندما فاض بها الكيل لم تجد سوى محكمة الأسرة حل لها.
قصص محكمة الأسرة.. مسافر من عمر بنتي
بدأت «هيام» حديثها وقالت: «أنا متجوزة بقالي 12 سنة معايا 4 بنات سايبه جوزي بقالي سنة واحدة، جوزي مسافر السعودية بيشتغل هناك من عمر بنتي الكبيرة بعد ما ولدتها سافر على طول عشان يشتغل ويحسن من دخله وسايبني أنا وبناتي من ساعتها».
دعاوي محكمة الأسرة.. بستلف من الجيران
أكملت حديثها قائلة: «جوزي مبيصرفش على العيال ولا على البيت من زمان وده كان السبب إني سيبته، لما بينزل بس مصر شهرين بس بيصرف علينا غير كدة مفيش، حتى لما بيصرف ويبعت فلوس بينقطنا ويصرف قليل أوي بستلف من الجيران وأخد من المحلات بالسلف وممشية أموري باللي بيبعته على القد».
حكايات محكمة الأسرة.. فاض بيا الكيل
تابعت حديثها قائلة: «فوق إنه مبيصرفش عليا مستحملة مشاكل أهله كانوا بيعملوا معايا مشاكل كتير عشان أنا عايشة معاهم في نفس البيت مستحملة المشاكل وانه مبيصرفش، لحد ما فاض بيا الكيل من البهدلة اللي عايشة فيها قررت اسيبه».
قضايا محكمة الأسرة..ساب البنات وسافر
أنهت الزوجة حديثها قائلة: «سيبتله البنات لما عرفت إنه نازل وقلت هيقعد بيهم ومش هيسبهم ويرجع يسافر تاني، لكنه سابهم وسافر عرفت من الجيران كلموني وقالولي بناتك في الشارع متبهدلين ومحدش معاهم، رجعت خدتهم معايا عند أخواتي مش عايز يصرف من ساعتها، رفعت عليه قضية خلع ونفقة من شهر 11 ودلوقتي رافع استئناف».
تابع أحدث الأخبار عبر
