أخبار محكمة الأسرة اليوم
أماني لـ محكمة الأسرة : أخوات جوزي عايزين يأكلوا حق بنتي
كانت أماني في محكمة الأسرة بعدما خسرت زوجها الذي كان سندها وضهرها في الدنيا ولم يتركها وحدها طوال حياتها معه، وعندما توفاه الله وجدت نفسها وحدها في الدنيا، واضطرت أن تواجه طمع وجشع أهل زوجها الذي يريدوا أن يأخذوا حق ابنتها بعد وفاة زوجها وعندما وجدت أماني نفسها بدون مساعد في حياتها توجهت لمحكمة الأسرة تبحث عن حل لمشاكلها.
قصص محكمة الأسرة..جوزي شايل مسؤولية بيته ومش مخلينا محتاجين حاجة
قالت «أماني» في بداية حديثها: «أنا كنت متجوزة من 19 سنة، خلفت من جوزي بنت واحدة بس كبيرة، أنا وجوزي كنا قرايب واتجوزنا من زمان وهو كان كويس جدا ومفيش منه مشاكل كان راجل زي باقي الرجالة وكان بيصرف علينا وشايل مسؤولية بيته ومش مخلينا محتاجين حاجة».
دعاوي محكمة الأسرة..جوزي مات ومسابش حاجة ليا أو لبنتي
أكملت «أماني» حديثها وقالت: «لحد ما جوزي اتوفي من شهر 7 السنة اللي فاتت، كان تعبان ومات وبعد وفاته كنت لوحدي ومفيش حد واقف معايا أنا وبنتي مكنش لينا ورث هو مسالبناش حاجة غير شقتنا مكنش كاتب أي حاجة لينا وده اللي طمع الناس فينا بعدين، وملقتش حد جنبي كنت لوحدي».
حكايات محكمة الأسرة..أهل جوزي عايزين يطردونا بعد وفاته
تابعت «أماني» حديثها قائلة: «كنا عايشين في بيت عيلة ومكنش فيه مشاكل مع أهل جوزي قبل ما يموت كانوا كويسين معايا، المشاكل بس كانت زي مشاكل وخلافات بيت العيلة العادية، بعد وفاته بقت كل واحدة في اخواته بتقول أنا ليا حق في الشقة عشان احنا مخلفين بنت واحدة بس ودلوقتي عايزين يطردونا من البيت بعد وفاته، من قبل ما جوزي يموت كان نفسي نكتب الشقة باسم بنتي عشان كنت عارفة إنهم هيعملوا معانا كدة، بس قالوا مينفعش نكتب الشقة باسم البنت في بيت العيلة».
قضايا محكمة الأسرة.. عايزين ياخدوا حق بنتي عشان معنديش ولاد
أنهت «أماني» حديثها قائلة: «اخوات جوزي البنات عايزين ياخدوا حقنا عشان معهوش صبيان، معرفتش أعمل معاهم ايه بس اجرنا الشقة بتاعتنا وسيبناها وقعدنا عند أهلي لحد ما نضمن حقنا، اللي خلانا نيجي المحكمة كان فيه فلوس هو سايبها لبنتي وجينا نسحبها قالوا لازم نعمل إعلان وراثة وأهله كانوا عايزين ياخدوها برضوا».
تابع أحدث الأخبار عبر
