أخبار محكمة الأسرة اليوم
محكمة الأسرة .. وفاء: أهل جوزي رموني في الشارع بعد وفاة ابنهم
بعد وفاة زوج «وفاء» كانت محكمة الأسرة هي الحل الأخير الذي لجأت له بعدما تخلى عنها الأشخاص الذي كانوا من المفترض أن يكونوا سندها في الدنيا بعد خسارة زوجها وأصبحت وحدها في الدنيا، وعندما وجدت «وفاء» نفسها وحدها في الدنيا دون عون أو مساعدة توجهت لمحكمة الأسرة بحثًا عن حقوقها التي حرمت منها هي وأطفالها الأيتام.
قصص محكمة الأسرة.. جوزي اتوفى في حادثة عربية
قالت «وفاء» في بداية حديثها: «أنا اتجوزت من 10 سنين معايا 3 أولاد من جوزي الحياة كانت كويسة وهو مكنش في مشاكل منه كان راجل كويس ومحترم وصايني أنا وولاده، لحد ما جوزي اتوفى من 3 سنين في حادثة كانت صدمة عليا ومعرفتش أعمل ايه بعد وفاته».
حكايات محكمة الأسرة.. أعدت مع أهل جوزي بعد وفاته
تابعت «وفاء» حديثها قائلة: «بعد وفاة جوزي ساعة الجنازة والعزاء قعدت مع أهله في بلدهم قلت أربي ولادي وسط أهاليهم وألاقي حد يقف معايا أنا وولادي، ومحرمش أمه من أحفادها وجوزي كان باني أوضة ليا أنا وعيالي عشان نعد فيها لما نروح زيارة قلت أعيش فيها أنا وولادي».
دعاوي محكمة الأسرة.. أهل جوزي طردوني بعد وفاة ابنهم
أكملت الزوجة حديثها قائلة: «عيشت معاهم فترة بعد ما اتوفى في بلدهم، بقوا على طول عايزين يدخلوا ويعدو في الأوضة دي وياخدوا حاجتي منها ولو رفضت يتخانقوا معايا ويعملوا مشكلة طمعانين حتى في الأوضة، بعدها بشهر ونص طردوني لما رحت أعيش معاهم وقالولي روحي مصر اشتغلي واصرفي على عيالك وكفي طلباتهم واضطريت وقتها أني انزل اشتغل عشان خاطر ولادي».
قضايا محكمة الأسرة.. رفعت قضية إعلام وراثة عشان ولادي
أنهت «وفاء» حديثها: «لما مشيت ولادي كانوا صغيرين وقتها وملهمش حد غيري في الدنيا وأهل جوزي لا بيسألوا ولا بيصرفوا من ساعة ما طردوني من البيت، وأنا اللي شايلة مسؤولية ولادي وبصرف عليهم ومفيش حد واقف جنبي، جيت المحكمة عشان أرفع قضية وصاية وإعلام وراثة عشان أقدر أخد حقي وحق ولادي اللي مبقاش ليهم غيري في الدنيا».
تابع أحدث الأخبار عبر
