أخبار محكمة الأسرة اليوم
رجاء في محكمة الأسرة : جوزي بيرفع عليا المسدس وبنتي سايباني عشان بنصحها
كانت أسباب وجع «رجاء» وهي على أبواب محكمة الأسرة كثيرة، أولها بسبب زوج حرمها من حقوقها وعاملها معاملة سيئة طوال سنين حياتهم، وعندما حاولت أن تتركه حتى تعيش حياة مستقرة وطبيعية لا يوجد بها ألم أو إهانة، وجدت ابنتها الكبيرة التي تحملت الكثير من أجلها تخلت عن والدتها ولم تقف في صفها أو تنصفها وكان هذا سبب وجع «رجاء» الكبير.
قصص محكمة الأسرة.. استحملت جوزي عشان ولادي ميتبهدلوش
بدأت «رجاء» حديثها: «أنا تجوزت من 15 سنة ومعايا من جوزي بنت وولد، بنتي عندها 18 سنة وابني 16، جوازنا كان جواز صالونات، من ساعة ما اتجوزت وأنا فيه مشاكل بيني وبين جوزي، كان بني أدم صعب محدش يقدر يستحمله بس أنا عيشت معاه واستحملته عشان خاطر ولادي إنهم ميكبروش ويلاقوا أبوهم وأمهم متطلقين ويتبهدلوا».
حكايات محكمة الأسرة..جوزي معقد نفسيا
تابعت «رجاء» حديثها قائلة: «جوزي كان معقد نفسيا وبني أدم مش طبيعي وبيكرهني بيعاملني كأني عدوته وكان بيرفع عليا المسدس ويهددني إنه يقتلني وكان ضرب وإهانة بسبب ومن غير سبب،كان بيستغل إن مفيش حد يقفله ويوقفه عند حده وبيزيد في جبروته، لحد ما قررت اسيبه ومرجعلوش تاني أبدا ورفعت عليه قضية خلع».
دعاوي محكمة الأسرة..بنتي سابتني عشان خاطر أبوها
بعد تحمل «رجاء» لزوجها لسنين عديدة من أجل مصلحة أبنائها حتى لا تتدمر حياتهم، لكن ما وجدته منهم هو التخلي عنها، لأنها طالبت بحقوقها وحريتها، وتركتها ابنتها فقط لأنها كانت تمارس دورها كأم وتنصحها لكي تكون شخص أفضل
أضافت الزوجة: «بنتي الكبيرة مرضيتش تعيش معايا وراحت عاشت مع أبوها عشان مبتحبش حد يقولها صح أو غلط أو متعمليش ومتلبسيش وأنا طول الوقت بما اني أمها كنت على طول بقولها وانبه عليها إنها متعملش حاجة غلط لكن هو مكبر دماغه، وهي عنيدة زيه وسابنتي بالعند فيا وأنا أصلا كان أكبر سبب سيبته عشانه هو العند والضرب والإهانة، وبعد ما صبرت على جوزي طول السنين دي عشان خاطر ولادي بنتي وقفت معاه وموقفتش معايا ومتهماني إني سبب خراب البيت ».
تابع أحدث الأخبار عبر
