أخبار محكمة الأسرة
هربان وسيبنا.. أسماء لـ محكمة الأسرة: بخيل ومش عاوز يصرف علينا
كانت «أسماء» في محكمة الأسرة بعد معاناة طويلة عاشتها مع زوجها الذي اختارته أن يكون شريك حياتها ووالد أطفالها، وعندما وجدت منه القسوة توجهت لمحكمة الأسرة بعد هروب زوجها منها حتى لا يعطيها حقوقها وحقوق أبنائها وبعد اكتشافه أن زوجته رفعت عليه قضايا خلع ونفقة عاد الزوج فقط من أجل مصلحته وخوفه من مصيره.
قصص محكمة الأسرة.. أهلي اللي جابولي العريس
بدأت «أسماء» حديثها: «أنا اتجوزت من 2015 وخلفت من جوزي ولد وبنت، كان جواز عادي أهلي هما اللي جابوه وعشان كانوا مقتنعين بيه اتجوزنا بسرعة بعد الخطوبة وكان ميبانش عليه أي وحشة كان شكله راجل زي بقية الرجالة».
حكايات محكمة الأسرة.. جوزي هرب وسابنا
تابعت «أسماء» حديثها قائلة: «المشاكل معاه بدأت من زمان كان بنا ادم أناني مبيصرفش غير قليل جدًا لو صرف فلوس أصلًا، حصل بينا مشاكل كتيرة جدًا وكانت مبتتحلش وكل مادى بتزيد، وأهلي هما اللي كانوا بيتدخلوا ويحلوها عشان ميحصلش مشاكل والبيت ميتخربش، لحد ما فجأة ساب البيت واختفى».
دعاوي محكمة الأسرة.. بيقول للعيال ميعرفونيش مكانه
أضافت الزوجة: «بعد ما سابنا مشي وفضل وقت طويل بعيد ومعرفش هو فين دورت عليه في كل حته ومفيش فايدة ملقتهوش، بعد كده عرفت إنه كان بيشوف البنات من ورايا وبيقولهم ميعرفونيش مكانه فين، لما عرفت كده من بنتي الصغيرة رفعت عليه قضية نفقة عشان يصرف على العيال اللي راميهم ومش بيسأل فيهم دول».
قضايا محكمة الأسرة.. رفعت قضية خلع عشان مرجعش للبهدلة
أنهت «أسماء» حديثها قائلة: «لما رفعت عليه القضايا رجع عشان يحل ودي، كنا كل ده لسه متجوزين ومتطلقناش طول الفترة دي أنا رفعت الخلع من شهرين بس، واللي خلاني ارفعه إن حتى لما رجع عشان يحل ودي رفض إنه يصرف علينا أي حاجة قالي هديني مصروف ليا وللعيال قليل جدًا؛ وكان عايز يرجع البيت كان مفيش حاجة حصلت بس أنا مقدرش ارجعله وأرجع للبهدلة اللي كنت عايشة فيها دي هو رجع بس عشان خايف من القضايا وعشان خاطر نفسه».
تابع أحدث الأخبار عبر
