أخبار محكمة الأسرة اليوم
معرفلوش طريق جرة .. رانيا لـ قاضي محكمة الأسرة: أهله مخبينه عني
محكمة الأسرة هي آخر أمل تقف على بابه «رانيا» باحثة عن حقوقها من زوج لم يتحمل المسؤولية ولا تعرف له طريق جرة، استمر في إهمالها وأولاده حتى هرب وتركهم دون سؤال أو مساعدة، واضطرت أن ترفع قضية نفقة في محكمة الأسرة لتستطيع أن تؤمن لأطفالها حياة مستقرة وطبيعية.
قصص محكمة الأسرة..من ساعة ما أتقدم وهو معهوش فلوس
بدأت «رانيا» حديثها: «أنا متجوزة من 12 سنة مخلفة من جوزي اتنين ولد وبنت، ودلوقتي سايباه بقالي 8 شهور، أنا وجوزي كنا جيران هو شافني في الشارع وسأل عليا وعلى أهلي واتقدملي واتجوزنا وكانت الدنيا كويسة ومفيش مشاكل أيام الخطوبة، ومن ساعة ما اتقدم لي وهو ظروفه مش أحسن حاجة ومعهوش فلوس».
حكايات محكمة الأسرة.. كان فيه خلافات كتير بسبب المصاريف
تابعت «رانيا» حديثها قائلة: «اتحملت ظروفه وقلت معلش أقف جنبه ومسيبهوش، كنت بعمل اللي أقدر عليه وعشان بيتي ميتخربش وعيالي ميتبهدلوش، ساعدته قبل الجواز في فلوس الجهاز ولما اتجوزنا في مصاريف البيت، اختلفنا كتير بسبب الموضوع ده كان فيه خلافات من زمان الدنيا كانت بتعدي عشان العيال بس مبقاش ينفع خلاص
دعاوي محكمة الأسرة.. جوزي سابنا عشان ميتحملش المسؤولية
أضافت الزوجة:«كنت بشتغل واصرف وهو مبيصرفش وكنت بقول معلش ظروفه وهيعمل ايه، لكن هو كان زيادة عن حده مبيصرفش خالص ولا قليل ولا كتير، رمى المسؤولية عليا لوحدي كنت شايلة مسؤولية كل المصاريف، اتحملت كتير لحد مبقاش نافع خلاص، وهو أصلا سابنا ومشي ورمى المسؤولية عليا».
قضايا محكمة الأسرة.. أهل جوزي عارفين مكانه ومش راضيين يعرفوني هو فين
أنهت «رانيا» حديثها قائلة: «من ساعة ما مشي معرفش هو فين وأهله بيقولوا انهم مش عارفين مكانه بس هما عارفين ومش راضيين يقولولي، أنا علاقي بيهم كانت عادية بس لما اخوهم مشي مبقاش حد يقف مع حد ولا سألوا فيا أنا والعيال، ولحد دلوقتي معرفلوش طريق ومحصلش انفصال لسه ولا رفعت قضية خلع بس رفعت قضية نفقة عشان أقدر أكفي مصاريف ولادي لأني مش قادرة لوحدي».
تابع أحدث الأخبار عبر
