أخبار محكمة الأسرة اليوم
نهاد لـ محكمة الأسرة : بنتي ضاعت بسبب الخلافات مع أبوها وأصبحت مدمنة مخدرات
تواجدت نهاد في محكمة الأسرة لترفع دعوى خلع على زوجها بعد 23 سنة من الحرب عاشتهم معه، توسمت الزوجة في زوجها أن يكون زوج وأب صالح لها ولأولادها، ولكن ما عاشته معه كان حياة يملأها الألم والحسرة والقسوة وتوجهت لمحكمة الأسرة لتبحث عن حريتها بعد أزمتها مع زوجها التي دمرت حياة ابنتها.
قصص محكمة الأسرة..وصلت لحيطة سد مع جوزي
«عديت كتير عشان مخربش البيت وفي الأخر وصلنا لحيطة سد» هذا ما بدأت به «نهاد» حديثها عن معانتها مع زوجها الذي دمرها ودمر أسرتها وأحلامها تابعت الزوجة: «أنا متجوزة بقالي 23 سنة، خلفت من جوزي بنتين، اتعرفت عليه عن طريق كان معايا في الشغل ، اتجوزنا على طول كان شكله بني أدم محترم وبيحبني وهيحافظ عليا لكن عيشت في مأساة بسبب الخلافات من أول سنة جواز».
تابعت «نهاد» حديثها قائلة: «الظروف كانت وحشة وكان مش معاه يصرف مع الضغوط والمسؤولية اضطريت أنزل اشتغل، مشتغلتش بشهادتي لأن كان مرتبها ضعيف اشتغلت في الملابس لأنه بتجيب فلوس أكتر، والمشاكل بينا كانت كتير بسبب الخلافات كنا مختلفين عن بعض تماما المؤهل التعليمي بتاعي كان أعلى منه ولما بقيت اشتغل بقى مرتبي أعلى منه والفكر بينا كان مختلف، مكنش بيصرف حياتنا كلها كانت عند في عند».
حكايات محكمة الأسرة..بنتي ضاعت بسبب الخلافات
أضافت الزوجة:«من كتر المشاكل بيني وبين جوزي بنتي الكبيرة كانت هتضيع مني، اتجوزت عرفي من ورايا وهي عندها 19 سنة وفي تالتة ثانوي ، عرفت لما سابتلي البيت وهربت ودورت عليها كتير واختفت ولما عرفت اضطريت ألم الدنيا واجوزها رسمي وطلع في الأخر بتاع مخدرات وهو اللي علمها شرب المخدرات ودفعتله فلوس عشان خاطر يطلقها، بعد ما طلقتها منه وديتها لدكتور نفسي عشان تتعالج من الإدمان، اتحسنت وبقت كويسة وجبتلها شغل وربنا قدرني إني ألحقها».
أنهت «نهاد» حديثها قائلة: «لما اتطمنت عليها أنها بقت كويسة قلت كفاية كدة المشاكل وسيبت جوزي، أنا بقالي 23 سنة عايشة في حرب معاه اضطريت ارفع عليه قضية خلع بعدما قلتله نطلق بالمعروف رفض».
تابع أحدث الأخبار عبر
