أخبار محكمة الأسرة اليوم
أم نادين لـ محكمة الأسرة: جوز بنتي حشاش وكانت هتموت في إيده
تواجدت «أم نادين» مع ابنتها لتقدم لها الدعم النفسي والمعنوي؛ بعد ما مرت به من أزمة مع زوجها الذي وافقت عليه على أمل أن يصون ابنتها ويرعاها، لكن ما فعله معها دمر حياتها وأوصلها لمحكمة الأسرة لتبحث عن حقوقها.
قصص محكمة الأسرة.. جوزت بنتي لواحد ووثقت فيه إنه يخلي باله منها
قالت «أم نادين» في بداية حديثها: «أنا جاية المحكمة مع بنتي عشان رافعة قضية خلع ونفقة على جوزها، هي متجوزة بقالها سنتين بس، وخلفت منه بنتين ولما اتقدملها كان عريس مناسب وأهله ناس كويسة ومفيش منه مشاكل ووثقت فيه يكون محترم ويخلي باله منها ويحافظ عليها لكن بعد كدة كل حاجة اتغيرت».
حكايات محكمة الأسرة.. قلت لبنتي تحافظ على بيتها ومتخربهوش
تابعت «أم نادين» حديثها قائلة: «بعد الجواز بنتي كانت عايشة مع جوزها والحياة طبيعية ومفيش مشاكل والدنيا عادية، بنتي كانت بتشتكي ساعات من المصاريف بس أنا كنت بساعدها واديها على قد ما أقدر اللي يكفيها ويكفي بيتها وكنت بقولها تتحمل جوزها ومتخربش بيتها ومكنتش أعرف اللي هي مخبياه عليا».
دعاوي محكمة الأسرة.. طلع بيشرب حشيش
كان أمل أم نادين أن ترى ابنتها مستقرة وسعيدة في حياتها ولكن ما لم تكن تعلمه أن الزوج الذي اختارته لابنتها كان سبب ألم ووجع لها في حياتها.. أضافت الأم: «في يوم بنتي كلمتني وهي في المستشفى ولما رحت لقيتها كانت مضروبة ومتبهدلة ومفهمتش وقتها ايه اللي حصل لكن اللي عرفته بعد كدة إن جوزها ضربها عشان اختلفوا مع بعض على المصاريف، وطلع بيشرب حشيش ولما بيشرب بيكون مش في وعيه وهي مقالتليش ولما ضربها كان شارب ومش شايف قدامه الجيران طلبوا البوليس عشان يلحقوها منه».
قضايا محكمة الأسرة.. قضية نفقة صغار
أنهت «أم نادين» حديثها قائلة: «كانت أول مرة يعمل معاها كدة كان على طول فيه مشاكل بس كانت تعدي، المرة دي كانت عايز يموتها، ومن بعدها هرب وسابها من غير أي حاجة خالص هي وبنتها وجت المحكمة عشان ترفع قضية نفقة صغار».
تابع أحدث الأخبار عبر
