أخبار محكمة الأسرة
محكمة الأسرة .. مروة: جوزي حرق قلبي على ابني وخطفه مني
كانت محكمة الأسرة المكان الذي توجهت له «مروة» مثل العديد من السيدات حتى تبحث عن حقوقها التي لم تستطيع أن تحصل عليها بالطرق الودية، لكن كانت خسارة «مروة» أكبر فهي خسرت ابنها الذي خطفه زوجها وحرمها منه حتى يحرق قلبها عليه ولم يكفيه القسوة التي راتها منه طوال سنين حياتها معه.
قصص محكمة الأسرة.. كنت بتقي ربنا في جوزي
قالت «مروة»: «أنا اتجوزت من زمان وخلفت من جوزي 3 أولاد ولد وبنت وولد صغير، كان جواز تقليدي طول حياتي معاه بصونه وبرعاه ومش مخلياه محتاج حاجة هو في الأول كان عادي لكن بعد كدة اتغير وبقي واحد تاني ومصانيش زي ما كنت بصونه».
دعاوي محكمة الأسرة.. مبيصرفش علينا غير على القد
تابعت «مروة»: «كان في مشاكل كتير بيني وبين جوزي بس كنا زي اتنين والدنيا كانت بتمشي ومفيش مشاكل، المشاكل الأكبر كانوا على المصاريف وانه مش مكفينا وبيصرف يدوبك على القد، حاولت كتير إني امشي الدنيا باللي معاه عشان خاطر ولادي لكن الدنيا كل مادي كانت بتبقى أصعب».
قضايا محكمة الأسرة.. بيتهمني إني بعمل أعمال
أكملت «مروة» حديثها: «كان بيتهمني إني سبب فقره وسبب المشاكل كلها، وبقى كل خناقة يقول اني سبب مشاكله في الدنيا استحملت كتير وكبرت دماغي على أمل إنه يتعدل في يوم من الأيام لكن مفيش فايدة، ابني الكبير فسخ خطوبته واتهمني اني السبب لأني عملتله أعمال، لحد ما زهقت منه من الحياة معاه وطلبت الطلاق ورفض».
حكايات محكمة الأسرة.. طلق مراته عشان معرفش اطلق منه
أنهت الزوجة حديثها: «اتجوز تاني أول ما سيبته رفعت طلاق ضرر لأنه اتجوز تاني، طلق مراته عشان يقدم ورق في المحكمة أنه طلقها عشان اخسر قضية طلاق الضرر ومعرفش اخد منه حقي وفعلا خسرتها وبعدها رد مراته تاني، ابني الصغير كان واخده مني عملت قضية ضم صغير ولما خدته رفعت قضية نفقة واتحكملي بـ 1000 جنية والولد قعد معايا 5 شهور لحد ما هو قابله بره وخده خطفوا ومش مخليني اشوفه عشان ميدفعش نفقة ويحرق قلبي عيله، دلوقتي رافعة عليه قضية خلع».
تابع أحدث الأخبار عبر
