أخبار محكمة الأسرة
محكمة الأسرة.. نورهان بدعوى نفقة: صعبان عليا ارفع على عشره العمر قضية
كانت قضية «نورهان» في محكمة الأسرة عكس قضايا عديدة وصلت لهذه النهاية بعد خلافات عديدة بين الزوجين ، ولكن وصلت الزوجة لهذه النهاية بسبب صعوبة استكمال الحياة مع زوجها عشره عمرها الذي اختارته ان يكون شريك حياتها أبو أولادها، الذي بنت معه حياتها وأسرتها ، ولكن بسبب الظروف المادية الصعبة كان الانفصال هو الحل الوحيد المناسب بعد أن الصبح من الصعب أن يكملوا حياتهم سويا، ولكن بسبب رفض الزوج الحلول الودية، أجبرها الزوج لتتوجه لمحكمة الأسرة حتى تحصل على حقوق أبنائها.
قصص محكمة الأسرة.. حياتنا كانت زي اتنين طبيعين
قالت «نورهان» في بداية حديثها: « اتجوزت من سنين كتيرة وخلفت من جوزي ولدين، مكنتش اعرفه قبل الجواز اتقدملي وكان شخص مناسب اتجوزنا على طول، حياتي معاه كانت طبيعية زي اتنين مفيش مشاكل بينا غير بسيطة والدنيا كانت ماشية وكل حاجة بتعدي، مكنتش اتخيل اننا نوصل للحالة دي في يوم من الأيام».
حكايات محكمة الأسرة.. جوزي مش قادر يكفينا
تابعت «نورهان»: «جوزي كان بيشتغل وهو اللي بيصرف على البيت والولاد ومش مخلينا محتاجين حاجة مع الوقت الدنيا كل مادى كانت بتبقى أصعب، المعيشة كل مادى كانت بتبقى صعبة والدنيا بتبقى أغلى والمسؤولية بتزيد علينا، مرتبه مبقاش يكفينا ومبقاش قادر يكفينا زي الأول.»
دعاوي محكمة الأسرة.. رفعت خلع لأنه مش مكفينا
أكملت الزوجة حديثها:« كل مادى الظروف كانت بتبقى أصعب، أنا عارفة ان مكنش في ايده حاجة يعملها، بس الدنيا كانت صعبة أنا والعيال محتاجين دايما، لحد ما قررت أرفع خلع لأنه رفض يطلقني لما طلبت منه بعد مبقاش ينفع نكمل سوا، بعدها اتفقت معاه اننا مش قادرين نكمل مع بعض، بعد عشره عمر قررنا نطلق ودي».
قضايا محكمة الأسرة.. اضطرني ارفع عليه قضية نفقة
أنهت «نورهان» حديثها: «الطلاق كان صعب عليا لكن علاقتنا كانت لسه كويسة بعد الطلاق كان بيشوف الولاد، لكن المشكلة بقى مبيصرفش أكتر من الأول والخلافات بينا كانت كتير جدا على المصاريف بيديني مواعيد انه يبعت فلوس للولاد ومش بيلتزم بيها لحد ما اضطرني إني أرفع عليه قضية نفقة عشان خاطر حق ولادي وأقدر أصرف عليهم».
