رجاء في محكمة الأسرة: عايز يحرمني من حفيدتي ويبهدلها زي ما بهدل بنتي
تواجدت السيدة «رجاء» أمام محكمة الأسرة لتقف أمام زوج ابنتها الذي رفع عليها قضية ليحرمها من حفيدتها ويحرق قلبها عليها مثلما حرق قلبها على ابنتها.
بعد أن زوجت «رجاء» ابنتها وحققت حلمها في أن ترى ابنتها عروسة لم تكمل أبنتها السنة مع زوجها وعادت لها وهي تحمل جروح عديدة بسبب ضرب زوجها واهانته لها ورفضت الأم وقتها أن تترك ابنتها تعيش في هذا العذاب وانقذتها من زوجها الذي يتعامل معها بوحشية، وبعد طلاقها عاشت معها ابنتها وحفيدتها حتى رزقت ابنتها بزوج صانها وحماها ومن وقتها رفع طليق ابنتها دعوى على الجدة ليضم الابنة لحضانته وهو حتى لم يصرف عليها طوال هذه السنين.
اقرأ أيضا
كنت رافضة جواز بنتي الأول
قالت رجاء: «أنا جوزت بنتي وفضلت مع جوزها أقل من سنة بس، هي عرفته عن طريق الشغل، ولما اتقدملها أنا رفضته ومكنتش موافقة على الجوازة عشان حسيته إنه مش مناسب، بس وافقت في الأخر عشان خاطر بنتي متتقهرش، وبعد جوازها منه بهدلها وكان بيضربها ومبهدلها وبنتي مكنتش بتقولي عشان متزعلنيش.»
جوزها وأهله ضربوها
تابعت رجاء: «لحد في مرة بنتي جتلي كانت مغرقة دم وجسمها متشوه من الضرب، وقتها هو وأمه واخته ضربوها وحبسوها عشان متقدرش تمشي، ساعتها خلتها تسيبه لأن قلبي كان محروق عليها وخفت ممكن يعمل فيها ايه تاني، اتطلقت منه ومخدتش حاجة قلت مش مشكلة المهم بنتي كويسة وسليمة.»
جوز بنتي عايز ياخد مني حفيدتي
أكملت الأم: «من ساعة ما بنتي اتطلقت وهي عايشة معايا هي وبنتها، واتقدملها واحد محترم وابن ناس اتجوزته ومن ساعتها طليقها رفع عليا قضية عشان ياخد مني حفيدتي لأنها قاعدة معايا من ساعة جواز بنتي، قبل ما بنتي تتجوز مكنش بيصرف على بنته ولا بيسأل عليها وبيشوفها عن طريق الرؤية بس كل يوم جمعة عيانة او سليمة لازم يشوفها، رافع عليا قضية بس عشان بنتي اتجوزت، واتدعى عليا إني هنتحر عشان يقدر ياخد البنت بعد ما قال عليا إني ست كبيرة ومقدرش اخد بالي منها.»
مبيصرفش غير الحجات التافهة
أنهت رجاء حديثها: «مش بيخليني أعد معاهم في الرؤية وبيدفع النفقة قليلة جدا بيجبلها حجات تافهة ومبيديهاش فلوس ولا يصرف عليها، مش عايزين منه حاجة ولا يصرف عليها انا معايا فلوس ومش محتاجاه في حاجة، البنت معايا وخالتها قاعدة بيها ومبترحش عند أمها وجوزها، ومامته ست كبيرة وتعبانة ووالده راجل مريض مفيش حد ياخد باله من بنته.»
تابع أحدث الأخبار عبر
