أسماء بدعوي طلاق للضرر: بعد عشره 23 سنة اتجوز عليا وجابلي المرض
بعد زواج دام لمدة 23 عام لم يعكر صفوه أي مشاكل تواجدت «أسماء» أمام محكمة الأسرة لترفع دعوى طلاق للضرر للزواج بأخرى ، وهي تحمل المرض والألم بعد زواجها.
أسماء بدعوي طلاق للضرر
عاشت «أسماء» مع زوجها سنين عديدة وكانت حياتهم طبيعية ولا يوجد بها سوى المشاكل الطبيعية مثل أي زوجين، وانجبت منه أولادها الثلاثة الذي ربوهم سويا حتى كبروا ، وظنت «أسماء» أنه لا يوجد مشكلة لن يستطيعوا تجاوزها سويا، ولكن اكتشفت «أسماء» أن زوجها أصبح له زوجة أخرى غيرها، تدمرت «أسماء» بعد سماعها للخبر حتى أصابها المرض ولجأت في النهاية لمحكمة الأسرة لتضع كلمة النهاية لحكايتها مع زوجها.
زواج طبيعي وحياة عادية
قالت «أسماء»: أنا اتجوزت من سنة 2000، خلفت من جوزي 3 أولاد، دلوقتي كبروا ودخلوا الجامعة ومنهم في ثانوية عامة دلوقي، ربيتهم أنا وجوزي وكبرناهم، ومكنش في بيني وبين جوزي غير المشاكل الطبيعية وكانت دايما بتتحل بسرعة، والدنيا كانت ماشية ومفيش حاجة.
جوزي اتجوز عليا
تابعت «أسماء»: لحد من شهر 7 اللي فات اكتشفت ان جوزي اتجوز عليا تانية وهو اللي قالي من ساعتها وحياتنا اتقلبت من ساعتها، جوزي رمانا وبقى مبيسألش فينا مفيش صرف ومفيش اهتمام خالص، بقى مبيصرفش علي ولا على العيال من ساعة ما اتجوز عليا ولا جنية بيقولي مليش دعوة بيكي انتي وولادك
جوزي جابلي المرض
أكملت «أسماء»: حاولت أكمل مع جوزي عشان مخربش بيتي لكن نفسيتي كل مادى كانت بتبقى أسوء من الأول، لحد ما تعبت جسديا بسبب تعبي النفسي لحد ما جالي السرطان بسبب التعب النفسي اللي كنت عايشة فيه، فوق ان جوزي مكنش بيسأل فيا أنا وعياله، ولادي كمان اتغيروا وبقوت معاملتهم معايا وحشة جدا، الولاد بقوا يتطاولوا علي وبيغلطوا فيا وهو واقف معاهم وبيشجعهم انهم يعاملوني وحش مش بيقف معايا.
دعوى طلاق للضرر
أنهت «أسماء» كلامها: لما لاقيت أن الحياة معاه صعبة ولا تحتمل وبسببه خسرت صحتي وشوية كدة وهخسر ولادي جيت المحكمة أرفع عليه قضية طلاق ضرر للزواج بزوجة أخرى، أنا حاولت أعيش بعد ما اتجوز عشان مخربش بيتي بس جوازته دي قصرت عليا ماديا ونفسيا وجسديا وأنا مش قادرة اتحمل.
تابع أحدث الأخبار عبر
