"الخاين لا يؤتمن أبدا".. هدى للقاضي " اتجوز عليا بعد سنتين جواز بس"
كانت الخيانة هي سبب تواجد «هدى» امام محكمة الأسرة فبعد سنتين فقط من زواجها وانجابها لطفليها اكتشفت ان زوجها تزوج عليها من سيدة أخرى ولم تقدر الزوجة على تحمل هذا الوضع وقررت ترك زوجها والبحث عن حريتها.
" حسبي الله ونعم الوكيل فيه" هذا ما قالته «هدى» في البداية وطوال حديثها عن زوجها الذي لم عاشت بسبب سنين ملأها الألم والحزن بسبب تركه لها ولأولادهم لمدة 8 سنوات بسبب زواجه من أخرى، وطوال هذه السنين لم يعكي زوجته أو أبنائه حقوقهم كاملة حتى حريتها رفض أن يعطيها لها وجعل زوجته تتوجه في النهاية لمحكمة الأسرة لتنهي قصتها معه وتعطي أولادها الحياة التي يستحقوها.
جوزي اتجوز عليا
قالت «هدى»: أنا اتجوزت من 11 سنة واعدت مع جوزي سنتين بس وسايباه بقالي 8 سنين ومطلقناش، خلفت منه اتنين بنت وولد، وفي أول الجواز الحياة كانت طبيعية ومفيش مشاكل، وبعد فترة اتجوز عليا واحنا لسه مكملناش سنتين مع بعض، كانت صدمة عليا لأن كذا مرة كان حد يتقدملي يكون مطلق مراته وانا ارفض وأقول يمكن يرجعلها ومكنتش أتوقع لما اتجوز ده يحصلي.
حسيت انه اتجوز عليا
تابعت «هدى»: عرفت لما قلبي حس انه اتجوز وواجهته وما نكرش وكان بيتكلم عادي ومأنكرش كأن مفيش حاجة حصلت، كان متجوز على أساس انه يبقى بينا احنا الاتنين وانا رفضت الوضع ده، في ستات تقدر تتحمله لكن أنا مقدرش، وسيبته بقالي دلوقتي 8 سنين ومرجعناش لبعض ومش هنرجع.
مش عايزه أعرفه ولا أشوفه
أكملت «هدى»: مبيصرفش علي أنا وعياله غير قليل طول الـ 8 سنين، عشان كدة كنت عارفه انه ميقدرش يعدل بين بيته وعياله وواحدة تانية، كل مادى كان بيزيد في البخل ومبيصرفش، ابويا اللي بيصرف علي أنا وولادي، مبيسألش على العيال ولا بيشوفهم كان بياخدهم شوية ويشوفهم ودلوقتي مفيش خالص وانا مليش علاقة بيه ومش عايزة اعرفه ولا اشوفه.
دعوى خلع ودعوى نفقة
أنهت «هدى» كلامها: الخاين عمره ما يؤتمن ولا تأمني لنفسك معاه تاني، أنا أعدت 8 سنين مطلقتش لأني كنت عايزة ارجع لبيتي بس مش وهو فيه واحدة تانية وهو مش راضي يطلقها، فرفعت قضية خلع عشان اخلص منه، ورفعت قضية نفقة لأنه حتى مصاريف المدرسة مش راضي يدفعها حسبي الله ونعم الوكيل فيه.
تابع أحدث الأخبار عبر
