«لسه آنسة وهتطلق».. نهى في دعوى خلع: طلع خمورجي وسايبني زي البيت الوقف
عندما تقدم زميل «نهى» لخطبتها لم تشك يومًا أن يكون هو السبب في تواجدها أمام محكمة الأسرة اليوم قبل أن يتم الزواج بينهم وكانت نهاية زواجها كما لم تتوقعها أو تأمل أي بنت أن تكون أبدا.
تعرفت «نهى» على زوجها من خلال محل عملها وتقدم لها وفي مدة صغيرة تمت خطبتها وقبل تعرفها عليه بشكل كافي تم عقد قرانهم، ومن بعدها ظهر الوجه الخفي لعريس «نهى» فكان شخص لا تستطيع أن تستأمنه على حياتها، فكان مدمن على الكحول وكان يعاملها معاملة سيئة ويهز ثقتها في نفسها، وقبلت «نهى» أن تكون مطلقة وهي مازالت آنسة لم تتزوج بعد وتوجهت لمحكمة الأسرة حتى تحصل على حريتها من زوجها الذي رفض أن يعطيها حريتها.
اتكتب كتابي ومتجوزتش
قالت «نهى»: أنا وجوزي اتعرفنا على بعض في الشغل واتقدملي مكنش جواز عن حب، وبعد فترة كتبنا الكتاب ومكنتش اعرف عنه حاجات كتير ولا أعرفه كفاية عشان اتجوزه، اتكتب كتابي من شهر 8 ومتجوزتش حتى وطلبت بعدها الطلاق.
المشاكل زادت بعد كتب الكتاب
تابعت «نهى»: المشاكل قبل كتب الكتاب كانت عادية زي الغيرة ومشاكل أي اتنين مخطوبين، لكن بعد كتب الكتاب المشاكل بدأت بجد، كان في بينا مشاكل كتير بسبب ومن غير سبب، احنا كتبنا الكتاب بسرعة وأنا مكنتش لسه جهزت لأنه كان بيسافر وشغله بره وقالي عايز نتجوز ونسافر سوا وأنا وافقت عشان نتجوز ويبقى لينا بيت يجمعنا.
طلع خمورجي
أكملت «نهى»: اكتشفت بعد كتب الكتاب انه بيشرب خمره، ظهر عليه لما كان بيتقل لسانه ومش عارف يتكلم، والمعاملة معاه مكنتش كويسة، بيهز ثقتي في نفسي ويقولي مش حاسس انك الست اللي عايز أعيش معاها، وأسلوبه بقى وحش معايا، لما عرفت انه بيشرب كانت أخر حاجة بينا وقررت اطلق منه.
دعوى خلع
أنهت «نهى» حديثها: لما طلبت الطلاق مش راضي يطلقني عند معايا بيقولي هسيبك كدة أنا مش خسران حاجة، وانا مبقتش مستحملة أسلوبه الصعب معايا لو كنت كملت معاه الله أعلم كان ايه اللي حصل معايا، بالرغم انه صعب عليا أكون لسه آنسة وهتطلق، لكن روحت محكمة الأسرة عشان أرفع قضية خلع.
تابع أحدث الأخبار عبر
