رانيا في دعوى خلع: عايزني خدامة في البيت ومش عايزني أنجح في حياتي
كانت أحلام «رانيا» في حياتها بسيطة أن تكون ناجحة في مجال عملها ويصبح لها شأن في المجتمع وبعد زواجها كان هدف زوجها تحطيم أحلامها ليحقق أحلامه.
تزوجت «رانيا» وانجبت من زوجها طفلين وفي أول فترة في زواجها كانت لا تعمل و تعيش لتربي أولادها وتخدم زوجها وبيتها، وبعد فترة ارادت أن تنزل سوق العمل رفض زوجها وبعد إصرارها وافق، ولكن بعد فترة حاول زوجها أن يجعلها تترك عملها عن طريق أن يجعلها تشعر أنها مقصرة في حق بيتها وأولادها، ليكون هو الفرد الوحيد الذي يعمل ويحقق أحلامه في مجال عمله، وعندما أرادت الزوجة أن تحافظ على عملها وعلى حياتها توجهت لمحكمة الأسرة حتى ترفع دعوى خلع على زوجها.
مش عايزني اشتغل
قالت «رانيا»: أنا اتجوزت من 2010 الشغل كان سبب الطلاق مش عايزني اشتغل، أول لما اتجوزت اعدت شوية مشتغلش، بعد كدة حسيت اني نسيت دراستي وشغلي، طلبت من جوزي ارجع للشغل رفض وقلتله ده شغلي ودراستي انا متعبتش كل ده في حياتي عشان اعد في البيت، بعد إصرار كتير مني وافق اني انزل اشتغل.
مشاكل كتير بسبب شغلي مع جوزي
تابعت الزوجة: لما نزلت الشغل بقى يتلكك على اي حاجة ويقول عليا مهملة معاه وفي البيت وده محصلش أنا كنت على قد ما اقدر بحافظ على البيت والشغل، انا بشتغل في قسم الحوادث وشغلي بياخد وقت كتير، وهو كان بيتضايق اني بتعامل مع ناس كتير في شغلي، وكان في بينا خناقات كتير بسبب موضوع الشغل.
مش عايز يشوفني ناجحة
أضافت «رانيا»: كان عايز يبقى هو اللي شغال بس ويثبت نفسه وانا ابقى خدامة في البيت، مكنش بيضربني كان خناقات كتير وكلام بيوجع أكتر من الضرب بيقول عليا مش مسؤولة ومهملة وهو بيعمل كل ده لأنه مش حابب يشوفني ناجحة في شغلي عشان متكبرش عليه حتى أهله شايفين كدة قالولي انه بيعمل كدة عشان مش عايزني انجح.
دعوى خلع
أنهت «رانيا» كلامها: لحد ما تعبت منه وجيت أرفع عليه قضية خلع لأنه مش راضي يطلقني وبيقولي انه بيحبني بس اللي بيحب حد بيحب يشوفه ناجح وهو مش بيعمل كدة.
تابع أحدث الأخبار عبر
