سارة في محكمة الأسرة: شكاك والشك عاميه بيضربني وبيشك فيا مع أخوه
كانت «سارة» في معاملتها مع زوجها تتقي الله فيه وفي بيتهم الذي بنوه سويا وكانت تعيش معه وهي أملها أن تربي ابنها وبعد كل ما قدمته لزوجها ما وجدته من زوجها هو القسوة والشك والمعاملة الجافة معها.
تواجدت «سارة» امام محكمة الأسرة وفي عينيها الدموع على ما رأته من زوجها طوال زواجهم لمدة 3 سنين فمنذ زواجها منه وكان الشك مسيطر عليه وعلى تصرفاته معها وبعد كل محاولاتها في أن تصلح حال زوجها وبعد صبرها عليه لسنين عديدة قررت أن تتركه وتعيش ما تبقى من عمرها من أجل نفسها ومن أجل أبنها حتى تعوضهم عما حدث معهم ورأوه من زوجها القاسي.
بيشك فيا وبيضربني من ساعة ما اتجوزته
قالت «سارة»: اتجوزت من 3 سنين وخلفت من جوزي ولد بس وكان جواز صالونات عادي، الحياة في الأول كانت عادية لكن مع الوقت كان طباعه الصعبة بتزيد مع الوقت، كان بيشك فيا طول الوقت، وكان بيضربني بسبب او من غير سبب، وكنت بتحمل عشان مخربش بيتي ومطلقش.
مش واثق فيا ومقدرش أعيش معاه
تابعت الزوجة: مش بيثق فيا من ساعة ما اتجوزته، وعلى طول بيشك فيا، ابني الصغير في مرة قال على عمه بابا، ساعتها عمل معايا مشكلة كبيرة، وشك فيا وقالي ليه بيقول كدة ومسكني ضربني ساعتها علقة موت، وفي مرة تانية واحدة صاحبتي كنت بكلمها في التليفون وهي كانت مسجلة الرقم باسم جوزها لما شاف الأسم اتجنن وضربني برضو ساعتها وغضبني عند أهلي وسابني عند اهلي فترة ساعتها لحد ما فهم الحقيقة ورجعني.
بيقول عليا كلام وحش قدام الناس
أضافت الزوجة: زهقت من الحياة معاه فوق اللي بيعمله معايا مبيصرفش عليا أو على ابنه وكان ضرب واهانة وبهدلة فيا وفي ابني، سيبته بسبب الشك وعمايله اللي بقت لا تحتمل غير الكلام اللي كان بيقوله عليا قدام الناس، اهله كانوا بيقفوا معايا على قد ما يقدروا بس هو مفيش فايدة فيه وميتغيرش، مش عايز يطلق عشان ميدنيش حقي، ورفعت عليه قضايا خلع ونفقة بقالي شهور، بقالي سنة قاعدة عند أهلي ومبيسالش عليا ولا بيصرف على ابنه.
