«مستتاه ومسلمتش من شره».. سمية: بشتغل واصرف عليه وأخره 50 جنيه لـ 3 عيال
تواجدت «سمية» في محكمة الأسرة اليوم وهي لازالت تبحث عن حقوقها بعد ما انفصلت عن زوجها من 10 سنين، وبان عليها الإرهاق والحزن وعند الكلام معها تكتشف أنها في مشاكل مع زوجها منذ سنوات عديدة وأرهقتها الحياة والمشاكل.
تزوجت «سمية» منذ 15 عامًا ومنذ زواجها واكتشفت أن زوجها غير قادر على تحمل مسئولية بيت أو أسرة ولا يستطيع حتى الحصول على وظيفة، ورمى حمل المسئولية بالكامل على زوجته، واضطرت الزوجة أن تتحمل المسئولية وتنزل سوق العمل حتى تحافظ على بيتها وأسرتها، وتعوض أولادها عما ينقصهم، لم يقدر الزوج تعب زوجته أو أي من تضحياتها وجعل حياتها معه صعبة حتى اضطرها أن تنهيها، وبالرغم من حدوث الطلاق من 10 سنين لازالت «سمية» تحاول أن تحصل على حقوقها التي سرقها منها زوجها مع سنين عمرها التي ضيعتها معه.
من ساعة ما اتجوزنا وهو لا بيشتغل ولا بيصرف
قالت «سمية»: اتجوزت من 15 سنة، وخلفت 3 أولاد، كان جواز صالونات ومكنتش أعرف جوزي قبل الجواز ومطولناش في الخطوبة يمكن لو كنت عرفته قبل الجواز وطولنا في الخطوبة مكنش حصل كل ده، من ساعة ما اتجوزنا والمشاكل بدأت، كان لا بيصرف ولا بيشتغل وكل لما أتكلم معاه وأقوله يشوف شغلانة يعمل معايا مشكلة.
أنا اللي بشتغل وأصرف على بيتي وعلى ولادي
تابعت «سمية»: لما لاقيت الوضع كدة وهو مش ناوي يشتغل ولا يتغير اضطريت إني أنزل واشتغل، وبقيت أنا اللي بشتغل وبصرف عليه وعلى العيال طول السنين دي، وقلت هشتغل عشان أعرف أربي عيالي وأصرف عليهم وهو يمكن في يوم من الأيام ربنا يهديه ويبقى أحسن لكنه مكنش بيتغير أبدا بالعكس ده كل مادى بيبقى أسوء.
اقرأ أيضا
الحياة معاه كلها بهدلة وإهانة
أضافت «سمية»: المشاكل كل مادى كنت بتزيد كان على طول عايز فلوس ومبيصرفش ولا بيشتغل، اللي زاد بقى إنه بقى شتيمة وبهدلة وإهانة، وأنا كنت بتحمل عشان ولادي ميتبهدلوش، لكن تعبت من معاملته والحياة معاه خلاها صعبة ولا تحتمل، قررت أطلق وأخلص منه، ودلوقتي بقالي 10 سنين مطلقة، ولسه أنا اللي بشتغل وأصرف على ولادي بس خلصت منه ومن بهدلته.
بيدفع 50 جنيه نفقة لـ 3 عيال
أكملت «سمية» كلامها وقالت: أنا اللي صرفت على ولادي وكبرتهم ومبيصرفش عليهم، رفعت قضية نفقة أول ما اتطلقت وبقيت باخد 50 جنية على 3 عيال، لما بنتي الكبيرة خلصت تعليم النفقة اتقطعت ومبقاش يدفع حاجة، وال 50 جنية دي كانت مبتكفيش حاجة أصلا، ودلوقتي رفعت قضية نفقة لبنتي الصغيرة عشان الظروف صعبة ومبقتش قادرة أكفيهم لوحدي، وبقالي دلوقتي سنة متبهدلة في المحاكم ومخدتش حاجة.
تابع أحدث الأخبار عبر
