«سمعته طلعت وحشة».. دينا في دعوى نفقة: جوزي سرق مصاريف المدرسة من العيال
«دينا» زوجة أصيلة ساندت شريك حياتها وحاولت بكل الطرق مساعدته وتخفيف الحمل عنه، كانت تتقي الله في زوجها وأولادها وعاشت معه وتحملت حتى لا تخرب بيتها، لكن زوجها لم يقدر أي من تعبها أو التضحيات التي قدمتها له .
تزوجت «دينا» من جارها وكانت لم تعلم ما يخبئه القدر لها، لم تعلم «دينا» قبل الزواج أنه شخص غير قادر على تحمل المسؤولية وسوف يلقي المسئولية كلها عليها، لم لم تعلم حينما وافقت على الزواج منه أنها ستعيش 15 عامًا من التعب والأسى مع زوجها، وأنها ستطلق مرتين عند المأذون وتلجأ في المرة الثالثة لمحكمة الأسرة حتى تتخلص من هذا الزواج للأبد.
اقرأ أيضا
«دينا»: سمعته كانت مش كويسة لكن النصيب وقعني فيه
قالت «دينا»: «اتجوزت من 15 سنة وكان جارنا وساكن جنبنا لما تقدملي وافقنا عليه، بالرغم سمعته هو وأهله كانت مش كويسة من زمان بس احنا مكنش مصدقين والنصيب وقعني فيه، في الـ 15 سنة جواز حاولت اخلص منه كذا مرة واطلقت طلقتين عند الماذون وهو مرديش يطلق التالتة فاطلقت بدعوى خلع».
«دينا»: مكنش بيصرف علينا وفلوسه كلها لأمه
تابعت «دينا»: «سايباه من 2013 بسبب إنه بني ادم فاشل، مبيشتغلش ولا بيصرف عليا وعلى عياله، الأول مكنش بيكمل في شغلانة وبعد محاولات كتير مني بقى بيشتغل بس مبيديناش حاجة الفلوس كلها بيصرفها على أمه، أنا اللي كنت بشتغل وأصرف على البيت وعلى العيال، لما كنت ادي للعيال مصاريف المدرسة ياخد منهم الفلوس لنفسه، العيال فاشلة في الدراسة بسببه».
«دينا»: مكنش معايا فلوس ادفع للمحامي
تذكرت «دينا» معانتها مع زوجها وقالت: «بعد ما اطلقت مرتين عند المأذون كنت برجع عشان العيال يتربوا بين أبوهم وأمهم وأقول يمكن يتصلح حاله، لكن حاله مبيتصلحش فضل مفيش مصاريف ولا تحمل مسئولية ولسه فاشل، لحد ما خلاص تعبت وسيبته من 10 سنين ورفعت دعوى خلع قعدت سنين في المحكمة بسبب أن مفيش محامي عشان مش معايا فلوس ادفعله لحد ما كسبتها بعد سنين كتير، من ساعة ما سيبته وهو مبيسألش على عياله ولا حاول يردني، المرة الوحيدة اللي حاول يرجعني فيها من ساعة ما سيبته قالي نرجع وأنا الست اللي اشتغل وأصرف عليه وأصرف على العيال وهو مش هيتغير ونرجع بس شكل قدام الناس، رفضت ورفعت عليه دعوى نفقة عشان أقدر أصرف على ولادي».
تابع أحدث الأخبار عبر
