«انفصل عن عياله».. بثينة في دعوى نفقة: "جوزي كان بيضربني عشان اللي بيخوني معاها"
بعد مرور سنين على تجربة الزواج الفاشلة التي مرت بها «بثينة» مازالت تطرق على أبواب محكمة الأسرة لتحصل على حقوق أطفالها وتعطيهم حياة أحسن من التي عاشتها.
تزوجت «بثينة» قريب لها وهي لازالت صغيرة في سن ال 16 وأنجبت منه 3 أطفال وكان حلمها أن تعيش مع زوجها وتربي أولادهم مثل أي زوجين طبيعيين ولكن خيانة زوجها المستمرة لها جعلتها لا تستطيع تحقيق حلمها وأصبحت مطلقة وهي مازالت في مقتبل عمرها ومعها 3 أطفال هي مسئولة بالكامل عنهم، ولتنقذ أطفالها لجأت لمحكمة الأسرة لتحصل على حقوقهم كاملة لأنهم مستقبلها الذي تعيش من أجله.
اقرأ أيضا
قالت «بثينة»: «اتجوزت وأنا عندي 16 سنة كان قريبنا من بعيد عشت معاه 10 سنين وخلفت 3 عيال، وعيشت طول السنين دي وأنا بحاول أعدله وأصلحه لكن مكنش في فايدة، وبعد العشرة دي كلها اللي بينا اطلقت من 7 سنين لما العيشة معاه مبقتش تنفع خلاص».
«بثينة»: جوزي كان بيضربني عشان اللي بيخوني معاها
تابعت «بثينة»: «من أول جوازنا كان يعرف عليا ستات كتير بس واحدة هي اللي كملت معاه كانت جارتنا، عرفت علاقته بيها لما مرات أخوها هي اللي كلمتني وعرفتني، واجهته أني عارفة وأنكر إنه على علاقة بيها الموضوع اتكرر مرة واتنين وتلاتة أسمع إنه بيكلمها أو اشوفوا معاها في الشارع بيتكلموا، لما اتخانق خناقاتنا كانت بتوصل للضرب عشانها، يرجع ويقولي معلش ومش هتتكرر تاني وفضل الموضوع يتكرر مرة واتنين وتلاتة وعشرة، كل مرة أغضب وأسيب البيت وارجع لما يقول خلاص مش هيكلمها تاني ويغير نمرته واكتشف إنه بيكلمها تاني».
اقرأ أيضا
أضافت الزوجة: «حاولت أواجه الست اللي يعرفها لكنها كانت بتنكر علاقتها بيه، لحد ما خلاص أنا زهقت منه ومن خيانته ومبقتش عايزه أكمل معاه، سيبت البيت ورحت عند أهلي وطلبت الطلاق، وافق على الطلاق الودي بعد سنتين من المشاكل، اتجوز بعد طلاقنا بفترة قليلة من واحدة جارتنا تانية خالص غيرها بس كان يعرفها برضوا واحنا متجوزين».
«بثينة»:انفصلنا فانفصل على عياله
أكملت «بثينة» وهي حزينة على ما مرت به في حياتها وقالت: «تنازلت عن كل حاجة عشان كنت خلاص عايزه أخلص منه، ورفعت عليه دعوى نفقة عشان ولادي بس أنا استعوضت ربنا في حقي لكن مش هسيب حق ولادي اللي هو بقى مبيشفهمش من ساعة الطلاق، انفصلنا فانفصل عن عياله».
تابع أحدث الأخبار عبر
