«بسنت» لقاضي الأسرة: «عزمني بره عشان يسرق العفش ومشفش بنته من 9 سنين»
تزوجت «بسنت» ابن خالها وظنت أنه الضهر والسند، الذي سيحميها ويحبها، وبين عشية وضحاها انقلب الحال، وتحول إلى وحش كاسر، لتجد نفسها في أروقة محكمة الأسرة مطالبة بحقوقها.
رأت بسنت في ابن خالها نموذجا للرجل الطيب، وجمعت بينهما قصة حب كللت بالزواج، الذي أثمر عن طفلة ملأت عليهما البيت سعادة، لكن دوام الحال من المحال، انقلب حال الزوج، وأصبح يتهرب من المسئولية، ويقسو على ابنته الرضيعة.
قالت «بسنت»: «اتجوزت سنة و3 أشهر بس، وكان متدين وابن ناس دا غير انه ابن خالي، وعشت أنا وهو في شقة أبويا وأمي وهما معارضوش، قالوا هيقفوا معانا لحد ما ربنا يكرمه ويجيب شقة نسكن فيها، كان على طول بيتحجج إنه مش عايز إيجار وعايز يجيب حاجة ملك، كنت بوريه كذا شقة وكان بيتحجج بأي حاجة عشان ميشتريش».
تابعت «بسنت»: «الحياة كانت مستقرة ومفيش مشاكل لحد ما حملت، حياته اتقلبت وبقى مش عايز يكمل معايا، ولما ولدت المشاكل كترت اكتر، بقى مش عايز يصرف علينا خالص، ومبيرضاش يجيب لبنتي لبس أو لبن، وبعد الولادة بـ6 شهور خدني عشان يفسحني رجعت ملقتش عفشي ولا قسيمتي ولاهدومه ولا حتى صورنا، كأنه شبح واختفى ومعرفنالوش طريق من ساعتها، اتفاجئنا لما سمعنا من الجيران إنه جاب عربية ومحدش موجود وخد الحاجة من الشقة».
«بسنت»:بنتي اللي عندها 9 سنين متعرفش شكل أبوها
أضافت «بسنت»: «دورت عليه في كل حته، كلمنا خالي ولجأنا له لكنه مفدناش قالي منعرفش مكانه فين، بسبب اللي عمله ده العيلتين اتفرقوا، بنتي اللي عندها 9 سنين متعرفش شكل أبوها لأنه سايبها وهي عندها 6 شهور، ومشفهاش من ساعتها».
اقرأ أيضا
«بسنت»:عمره ما شافها ورافع قضية عشان ياخدها
استكلمت «بسنت» المأساة، قائلة: «رفعت دعوى طلاق لما سمعت من الناس إنه اتجوز وخلف، كسبت قضية الطلاق لكنه رفع استئناف عشان ميدفعش حاجة لإني كان ليا نفقة متعة ونفقة المتعة بتكون كتير لما الجواز يبقى مدة قصيرة، رفعت خلع عشان اخلص منه وكسبته، رفعت دعوى نفقة من 5 سنين كانت النفقة 400 جنيه، ودلوقتي مش مكفيين حاجة، الدروس بس بـ300 جنيه، فرفعت زيادة نفقة ولما رفعتها طلب ضم البنت من أسبوعين عشان ميدفعش زيادة النفقة، عمره ما شافها ورافع قضية عشان ياخدها وميدفعش حاجة ويبهدلها معاه».
تابع أحدث الأخبار عبر
