منى في دعوى طلاق: "مقضيها سهر والمخدرات خلته مش طايق عياله"
دعوى طلاق أفصحت «مُنى» خلال حديثها لـ الحادثة، عن أسرارها، ولماذا لجأت إلى محكمة الأسرة بعدما وجدته من زوجها الذي غير الإدمان سلوكياته وبدلت المخدرات أحواله حتى أصبحت العيشة معه مستحيلة.
وتعد المخدرات من أهم الأسباب التي ساهمت في زيادة الانفصال بسبب تصرفات وأفعال الزوج نتيجة لتغيب عقله، من بين هذه القضايا قضية «مُنى» التي لجأت لمحكمة الأسرة لرفع دعوى طلاق بعد حبسها هي وأولادها نتيجة إدمان زوجها المفرط للمخدرات.
منى في دعوى طلاق: "مقضيها سهر والمخدرات خلته مش طايق عياله"
"مبهدلني أنا والعيال بسبب القرف اللي بيشربه دا" بدأت «مُنى» تروي قصتها للقاضي وكانت هذه كلماتها الأولى وهي تشكي همها من زوجها عديم الرحمة بسبب ما يفعله بها هي والأولاد، أضافت: "كنت عارفة إنه بيشرب مخدرات من قبل الجواز بس كان مفهمني إنه بيشرب حشيش بس مش حاجة تاني وقلت مش مشكلة طالما مش خطر".
تابعت: "اتجوزنا وكان أول سنتين تمام ومفيش حاجة.. أه كان بيسهر برا كتير شوية وكنت خايفه من صحابه إنهم يجروه لحاجات أكبر من الحشيش عشان كان معروف عنهم في المنطقة إنهم مش كويسين".
القلق يحاوط الزوجة
كانت الزوجة لا تهتم في بداية الأمر ولكنها بدأت تقلق من سهره المتكرر مع أصحاب السوء خصوصًا أنه تغير في تصرفاته وأفعاله معها هي والأولاد، أكملت منى حديثها: "كنت بقول في الأول خليه براحته مع صحابه مش عايزه اخنقه بس بدأ يبقى عصبي ويتخانق على كل حاجة بعملها حتى مع العيال مبقاش طايقهم ولو حد منهم قاله أي كلمة يقوم يضربه".
تابعت: "الموضوع وسع ومبقاش حشيش بس لا بقا يشرب آيس بقا يضربني أنا كمان لو كلمته في أي حاجة وكذا مرة الموضوع يكبر والأهل تتدخل ويحلوا المشكلة ويتكلموا معاه ويقول هتعدل وهبطل أي حاجة بشربها".
فشلت كل محاولات الأهل
في كل مرة يتدخل الأهل بينهما كانت الزوجة تأمل في صلاح حاله ولكن أملها يخيب لأنه يزداد سوء، تابعت: "كل مرة أهلي كانوا بيتكلموا معاه كان بيقول خلاص هبطل وكنت بصدقه وبرجع تاني، بس كل مرة كنت برجع له كانت الدنيا بتبوظ أكتر عشان مبقاش يشوف حاجة قدامه وبيضربني أنا والعيال بأي حاجة قدامه".
أكملت «مُنى» حديثها عن دعوى طلاق بمحكمة الأسرة: "اتخانقت أنا وهو الشهر اللي فات وضربني أنا والعيال ولقيته خرج وقفل عليا الباب أنا والعيال وخد مني الموبايل وسابني كدا يومين وأهلي بتصلوا بيا مش عارفين يوصلوا لي، أهلى لما لقوا إنهم مش عارفين أنا فين وحصل لي إيه جم البيت وكسروا عليا الباب وخدوني أنا والعيال"، طلب الأهل من الزوج إتمام الطلاق خوفًا على بنتهم ولكنهم رفضوا ما دفعهم لرفع دعوى طلاق على الزوج ولا تزال القضية منظورة في المحكمة حتى الآن.
تابع أحدث الأخبار عبر
