سمر في دعوى نفقة: بعد ما ربنا كرمنا بالعيل رماني واتجوز علي
7 سنوات من المحاولات اللانهاية من قبل الزوجين من أجل أن يرزقهما الله بطفل، وتمنت الزوجة أن ترزق بزينة الحياة الدنيا، حتى تستقيم حياتها ويهدأ شوق الزوج ليصبح أبا، ويزيد بيتها سعادة واستقرارا، حقق الله أمنية الزوجة لكن باقي أحلامها انحرفت ناحية مأساة جديدة بتغير الزوج وهجرها ثم الزواج بأخرى، دون حتى أن يرى ابنه الرضيع ولو لمرة واحدة ما دفع الزوجة للجوء لمحكمة الأسرة ورفع دعوى نفقة لكي تصرف على رضيعها بعد استحالة رجعوهما.
"مكنش بيخلف" هذه الكلمات الأولى لـ سمر التي بدأت بها حديثها وهي تروي معاناتها مع زوجها الذي بدأت من بداية حملها، أضافت: "هو قريبنا وجالي أتقدم لي وأنا وافقت عليه عشان كويس وفعلًا طول فترة الخطوبة كان كويس معايا جدًا حتى بعد ما اتجوزنا كان كويس برضو وفضل لحد 7 سنين وهو بيعاملني كويس جدًا".
تابعت: "ربنا مكنش كارمنا بأطفال عشان هو عنده مشاكل في الدوالي وكان العيب منه، روحنا لدكاترة كتير أوي عشان نعالج المشكلة ونخلف والحمدلله بعد 7 سنين حملت بالعلاج الكتير اللي كنا بناخده".
تغير الزوج منذ أن عرف بحمل الزوجة
ظنت الزوجة أنه عندما يرزقهما الله بطفل بعد صبر دام لمدة 7 سنوات تصبح الحياة أكثر سعادة بينهما، وأنه يقف بجانبها في حملها ولكن في الحقيقة حصل عكس كل توقعات الزوجة وكان هو أول من يخذلها، في البداية كانت تتسأل الزوجة عن سبب تغيره لأنها لا تجد سبب لتحوله المفاجئ معها، فكانت الصدمة عندما تركها وذهب لتزوج من أخرى دون أنه يرى ابنه ولو مرة واحدة بعد ولادته.
تابعت سمر: "الحمدلله حملت والفرحة مكنتش سايعاني عشان مكنتش مصدقة إن ربنا هيكرمني بعد السنين دي كلها، وكنت فاكرة برضو لما جوزي يعرف هو كمان هيبقى مبسوط بس الحقيقة الدنيا تغيرت خالص وهو بقا واحد تاني خالص معايا".
أضافت: "طول ما أنا حامل وهو متغير معايا ومكنتش فاهمة لي بصراحة عشان احنا كنا كويسين قبل الحمل، بس من أول ما حملت وحصلت مشاكل كتير بينا واخواته اتدخلوا وبقوا يسخنوه عليا والموضوع كبر".
ملهي في جوازته التانية ومشافش ابنه
أكملت سمر حديثها: "مقدرتش استحمل المعاملة ومشيت وأنا حامل في الشهر التالت وفضلت مع أهلي لحد ما ولدت، كنت فاكرة إنه لما يعرف إني خلفت هيرجعني ونعيش سوا بس كنت غلطانة، وعرفت إنه اتجوز واحدة تانية وملهي في الجواز ومجاش حتى يشوف ابنه ولا يعرف شكله حتى".
تابعت: "طلبت منه الطلاق أول لما عرفت إنه اتجوز بس هو مش راضي يطلق عشان ميدنيش أي حاجة من حقوقي، قلت له طب ابعت فلوس لابنك اللي انت متعرفش شكله قالي مش باعت حاجة".
لجأت سمر لمحكمة الأسرة بالجيزة ورفع دعوى نفقة على زوجها بعد أن تركها أثناء حملها ورفضه لدفع أي مصروفات ابنه الرضيع، ولا تزال القضية منظورة في المحكمة حتى الآن.
