روحي كلي عند أمك.. أسماء في دعوى نفقة: «بيسيبني أنا والعيال باليومين والتلاتة من غير أكل»
بيوت كثيرة تفشل عندما يصبح البخل جزءا أساسيا في حياة الأزواج، لأنه يصبح الشخص بخيل على أعز الناس حتى أولاده، مثل أسماء التي لجأت لرفع دعوى نفقة على زوجها بسبب بخله الشديد عليها هي والأولاد في شراء طعام لهم.
«بشحت منه مصاريف العيال».. هذه الكلمات بدأت بها أسماء وهي تروي معاناتها التي دامت لمدة 7 سنوات بسبب بخله، أضافت: «اتخطبنا سنة ومكنش بجيب لي هدايا زي بقية الشباب بس أنا مكنتش بهتم أوي بالحاجات دي فكان بالنسبة لي عادي بس ناس كتير قالت لي بخيل وهيتعبك بعد الجواز.
تابعت: مكنش شايفة إن في مشكلة وقلت أكيد مش هيبخل على بيته يعني، بس كنت غلطانة لأنه من أول الجواز وهو مش عايز يصرف على البيت، كان بيسيب لي 100 جنيه طول الأسبوع ويقول لي جيبي كل طلبات البيت بيهم»..
أكملت حديثها: "الفلوس مكنتش بتكفي ولما أجي أقوله عايزة فلوس زيادة بيقولي هو دا اللي معايا مع إنه بيبقبض كويس، بس هو مش عايز يطلع أي فلوس من جيبه».
بخل الزوج على أولاده
كانت تتأقلم الزوجة بالمصروفات القليلة التي كان يتركها الزوج لها، ولكن مع مجئ الأطفال زادت المصاريف وأصبحت الزوجة تحتاج لمصروفات أكثر من أجل الأطفال ولكنه كان لا يهمه أمر شخص أخر سوى نفسه، تابعت: «خلفت بنتي الكبيرة والمصاريف كترت أوي وهو برضو مش راضي يزود المصروف، اتخانقنا كتير وفي كل مرة يقولي انتي مش مستحملاني وفي ستات كتير عايشة بأقل من كدا».
أضافت أسماء: «خلفت ابني التاني والمصاريف عمالة تكتر وهو ولا همه حاجة حتى لما باجي أقوله هات فلوس عشان أجيب أكل للعيال يقول لي خليهم يأكلوا أي حاجة، العيال بقت تصعب عليا بسبب اللي أبوهم عامله فيهم وأنا مش عارفة أعمل حاجة».
تمادى الزوج في بخله وترك أولاده لأيام دون طعام
ظنت الزوجة في بداية الأمر أنه يتغير حينما تأتي الأطفال ولكنه ازداد في بخله حتى وصل الأمر في أوقات كثيرة أنه يتركهم دون طعام ويذهب بالأيام دون سؤال على أولاده، أكملت الزوجة حديثها: «مبيصعبش عليه عياله وهو سايبهم كدا من غير أكل، وأخر فترة بقى بيسيبنا بالأيام منعرفش عنه حاجة من غير ما يسيب لنا أي أكل أو فلوس ولما أقوله سيب للعيال حتى فلوس عشان أجيب لهم أكل يقول لي روحي كلي عند أمك».. لجأت أسماء لمحكمة الأسرة بالجيزة لرفع دعوى نفقة منذ 5 شهور على زوجها بعد أن فقدت الأمل إنه يصرف على أولاده مليمًا واحد، ولا تزال القضية منظورة في المحكمة حتى الآن.
تابع أحدث الأخبار عبر
