الضرب والشتيمة أساسي في حياتنا.. ولاء بـ دعوى خلع: "بيصبحنا ويمسينا بعلقة"
دعوى خلع أقبلت عليها “ولاء” بعد حياة مريرة مع زوجها، بعدما أصبح الضرب والشتيمة جزء أساسي في حياتها هي وأولاها، ما دفعها أن تلجأ لمحكمة الأسرة وترفع دعوى خلع رغبة في أن تعيش حياة أدمية دون إهانة.
ولاء بـ دعوى خلع: "بيصبحنا ويمسينا بعلقة"
"اتصدمت فيه من أول أسبوع" بدأت ولاء حديثها تروي قصتها للقاضي، مؤكدة على معاملته القاسية معها منذ بداية الزواج.
تروي ولاء تجربتها منذ البداية قائلة: "في الخطوبة كان كويس معايا وحنين وكل حاجة تمام كنت بحسبه هيفضل كدا حتى بعد الجواز بس اتفاجئت بيه من أول أسبوع لما كان بيقول لي أعمله الغدا واتأخرت روحت لقيته جه ضربني بالقلم وكمل عليا وأمه واخواته حاولوا يحشوني بس معرفوش من إيده"، مضيفة: "أهله قعدوا يهدوني عشان ممشيش من البيت وقعدت وقلت يمكن كان عصبي في اليوم دا بس بقى دا أسلوبه اللي بيتعامل بيه معايا على طول كل يوم".
أصبح الضرب أسلوب حياة للزوجة والأولاد
تصادمت الزوجة بالواقع الأليم بعد دخولها لعش الزوجية التي كانت تظن أنه يمتلئ بالسعادة والتفاهم لا بال ضرب والذل التي تعيشه ولاء من الأسبوع الأول في الزواج، أكملت حديثها: “اتكررت الموضوع كتير وبقى على أي حاجة يضربني بسبب ومن غير سبب وأهلي اتكلموا معاه كتير بسبب موضوع الضرب دا بس هو مبيقولش حاجة غير دي مراتي وأنا حر”.
تابعت: "عدت سنة والتانية وهو برضو مبيتغيرش بالعكس بيزيد في ضربه ليا مع الوقت، في كل مرة كنت بقول لأهلي إني عايزة اتطلق بس كانوا بيقولوا لي مينفعش استحملي عشان عيالك".
دعوى خلع لجأت إليها ولاء
حاولت الزوجة التأقلم كثيرًا ولكنها فشلت في كل مرة بسبب زوجها الذي يتمادى في ضربه لها هي والأولاد، ما دفعها ترفع قضية خلع لتحيا حياة سعيدة، مشيرة: "مبقتش قادرة استحمل أعيش معاه يوم واحد تاني بسبب الضرب اللي بقا حاجة أساسية في حياتي أنا والعيال والواد والبت نفسيتهم تعبت بجد من كتر ما بقا يضربهم ليل ونهار".
أنهت حديثها قائلة: "نفسيتي أنا كمان تعبت بسبب إني بشوف العيال خايفين طول الوقت ومبقاش عندهم ثقة في أي حاجة ولا أي حد، رفعت دعوى خلع بقالي 3 شهور عشان أعيش أنا والعيال من غير خوف"، ولا تزال القضية منظورة في المحكمة حتى الآن.
تابع أحدث الأخبار عبر
