رحاب في دعوى طلاق : "اتجوزته عشان أهلي ودلوقتي بدفع الثمن ضرب وشتيمة"
"معندناش بنات تتطلق".. هذه الكلمات الذي يرددها الأهل عندما يعلمون بأن ابنتهم تريد الطلاق خصوصًا في المناطق الريفية خوفًا من كلام الناس، ويكون أهون عليهم أن تعيش البنت في ذل طوال العمر بدلًا من أن يطلق عليها لقب مطلقة، في هذه الحالات تلجأ زوجات كثيرة لمحكمة الأسرة لرفع دعوى طلاق دون علم أهلها لتتخلص من حياتها البائسة مثل ما فعلت رحاب.
رحاب في دعوى طلاق : "اتجوزته عشان أهلي ودلوقتي بدفع الثمن ضرب وشتيمة"
"عايشة معاه غصب عني" كان هذه الكلمات الأولى لرحاب وهي تسرد قصتها للقاضي، مؤكدة على زواجها دون رضاها لتلبي رغبة أهلها.
أضافت: "تقدم لي واحد عندنا من المنطقة كويس ومحترم وأهلي أول لما جه عشان يتقدم وافقوا على الخطوبة على طول من غير ما حتى ياخدوا رأيي خصوصًا لما عرفوا إنه بيقبض كويس".
تابعت: "أنا مكنتش مرتاحة ولا حباه وقولت لهم أنا مش موافقة على الخطوبة قالوا لي هتوافقي غصب عنك، وافقت وخلاص واتجوزنا وقلت أعيش يمكن يبقى كويس، ومن ساعة ما اتجوزنا وهو مش طايق لي كلمة مش فاهمة ليه وبيتخانق معايا على أتفه حاجة، غضبت كتير عند بيت أهلي وكل مرة يقولوا لي مش أول واحدة جوزها يعاملها كدا كلنا بنتضرب".
أسلوب الزوج همجي
ظنت الزوجة أن أهلها هم سندها الأول ضد أي شخص يحاول إهانتها ولكن خاب ظنها بعد أن ذهبت لبيت أهلها في كل مرة قام زوجها بضربها، تابعت: "كنت فاكرة إني لما أروح عند أهلي وأقولهم جوزي ضربني هيقفوا معايا ويجيبوا لي حقي منه، بس هما كانوا أول ناس تقول لي ارجعي لبيتك واستحملي".
أكملت حديثها: "كنت بقول في الأول يمكن هما الصح وأنا لازم استحمل بذات لما عرفت إني حامل، وقلت برضو يمكن أسلوبه يتغير لما يعرف إني هجيب طفل، بس لقيته بيزيد في ضربه ليا لحد ما سقطت".
دعوى طلاق دون علم الأهل
قررت الزوجة الانفصال بعد ما تمادى الزوج في ضربه وإهانته لها ولكن الأهل رفضوا وأجبروها على العيش معه ما دفع الزوجة تلجأ لمحكمة الأسرة وترفع دعوى طلاق على زوجها دون علم أهلها، تابعت: "مش قادرة أعيش معاه خلاص وعايزة اتطلق عشان أخر مرة خنقني بإيده وكان هيموتني، بس لما روحت عند أهلي كنت فاكرة لما يعرفوا إنه كان هيموتني هيوافقوا يطلقوني بس برضو قالوا لي معندناش بنات تتطلق عيشي واستحملي الناس هتقول علينا إيه لو اطلقتي".
أنهت حديثها: "لما لقيت مفيش فايدة رفعت قضية طلاق من غير ما أقول لأهلي بقالي 5 شهور"، ولا تزال القضية منظورة في المحكمة حتى الآن.
تابع أحدث الأخبار عبر
