نوال في دعوى نفقة: كسيب وبيستخسر فينا الجنيه أنا وعياله
دعوى نفقة تلجأ إليها الزوجات بعد أن يئسن من أن ينفق أزواجهن جنيهًا واحدًا عليها هي والأولاد على الرغم من أنه ميسور الحال وقادر على تغطية مصروفات المنزل والأولاد بالكامل.
"معاه فلوس ومبيصرفش علينا" بدأت نوال بهذه العبارة تسرد قصتها ومعاناتها مع زوجها الذي يرفض الإنفاق على الأولاد، مؤكدة أنها فشلت كل محاولاتها في كل مرة تطلب منه مصروفات، أضافت: "في الخطوبة كان بيجيب لي هدايا وكل حاجة أنا عايزاها ومكنش بيهمه موضوع الفلوس وهو صرف إيه".
تابعت: "من ساعة ما اتجوزنا وهو بقيت ألاحظ إنه مش عايز يصرف وبيسيب لي فلوس قليلة أوي مبتكفيش لأي حاجة ولما طلبت منه إنه يزود مصروف البيت قالي احنا يادوب اتنين بس عايزة فلوس تاني ليه".
تدخل أهل الزوجة لإصلاح الوضع
ظنت الزوجة أنه سوف يتغير منذ مجئ الأطفال ولكنه ازداد في بخله على الزوجة والأولاد ما أدي لوجود المشكلات والخلافات باستمرار، أكملت نوال حديثها: "كنت فاكرة إنه مبيسبش فلوس كتير عشان إحنا فعلًا اتنين بس زي ما هو بيقول بس لما خلفت أول طفل ليا فضل برضو زي ما هو وبقا يخرج برضو من غير ما يسيب فلوس ولو ساب بيسيب لي 30 جنيه بس حتى لما خلفت ابني التاني برضو كان نفس الأسلوب".
تابعت: "بدأ يبقى في مشاكل بينا كتير بسبب موضوع الفلوس دا وروحت عند أهلي قلت يمكن لما أهلي يتكلموا معاه يسمع كلامهم ويصرف عليا وعلى العيال، بس قالهم هو دا مقدرتي مع إنه بيكسب حلو من شغله ويقدر يعيشنا كويس بس هو مش عايز يصرف مش فاهمة ليه".
دعوى نفقة لجأت إليها نوال
بعد محاولات الزوجة المتكررة في إقناع الزوج أنه ملزم بالإنفاق على أولاده وبعد فشل الأهل أيضًا معه قررت نوال اللجوء لمحكمة الأسرة ورفع دعوى نفقة على زوجها، تابعت: "زادت الخناقات بينا بسبب موضوع الفلوس دا وهو برضو مش هامه عياله ولا هامه يأكلوا ولا مياكلوش وأنا زهقت بصراحة ومبقتش قادرة استحمل".
انهت الزوجة حديثها: "فضلت قاعدة عند أهلي ولما لقيت مفيش فايدة معاه رفعت قضية نفقة بقالي سنة عليه عشان مش عارفة أجيب أكل لعيالي"، ولا تزال القضية منظورة في المحكمة حتى الآن.
تابع أحدث الأخبار عبر
