سها في دعوى خلع: أبويا كان بيصرف على البيت وفي الأخر رماني وباع الشقة
زوج السيدة سها نسي ما فعله أهل زوجته معه ومساعدته له في كل تجهيزات شقة الزوجية، حتى شقة الزوجية والد الزوجة هو من اشتراءها ومع ذلك لم يراع مساندته له وباع الشقة ما دفع الزوجة لرفع دعوى خلع، بالإضافة إلى أنه كان يرفض الإنفاق على زوجته وأولاده.
مطمرش فيه كل اللي عملته معاه
"أبويا ساعده في كل حاجة في الجهاز".. كانت هذه الكلمات الأولى الذي بدأت بها سها حديثها تروي قصتها، مؤكدة على مساندة والدها لزوجها طوال فترة تجهيزات الشقة، أضافت: "أول ما جه يخطبني أهلي وافقوا على طول عشان كانوا شايفينه راجل كويس ومحترم، بالرغم من الظروف كانت صعبة معاه أبويا ساعده في كل التجهيزات حتى الشقة بابا هو اللي جايبها عشان مكنش معاه فلوس للشقة".
تابعت سها: "اتجوزنا وكان كويس معايا أول فترة في الجواز بس جه بعد كدا مبقاش عايز يصرف وكلمته على موضوع المصاريف قالي ظروف الشغل صعبة وهو بيقبض كويس ويقدر إنه يصرف عليا كويس جدًا كمان".
غدر بيا ورماني أنا والعيال
ظل الزوج على هذا الأسلوب حتى بعد إنجابهما لأطفال، وكانت تظن الزوجة أنه يتغير مع وجود الأطفال ولكن العكس هو الذي حدث وأصبح لا يريد الإنفاق على أولاده، أضافت: "مبقاش يسيب لي أي فلوس خالص ليا أنا والعيال وبقيت بصرف من المصروف اللي باخده من بابا، وكل لما أكلمه أقوله عايزة فلوس للعيال بقولي ما انتي بتاخدي مصروف من أبوكي اصرفي منه عايزة إيه تاني".
تابعت: "بقيت كل لما بسيب البيت وأمشي بابا يرجعني ويقولي عشان عيالك ويديني فلوس وأروح تاني البيت وبرضو مبيتعدلش فضلت كدا كتير وكنت صابرة برضو عشان خاطر عيالي".
أكملت: "فضلت كدا كتير كل شوية أغضب عند أهلي ومفيش حاجة بتتغير، في مرة كنت غضبانة عند بابا وقعدت عنده كذا يوم وبابا رجعني ولما رجعت لقيته باع الشقة".
انهت الزوجة حديثها: "بابا لما شاف كدا إنه مطمرش فيه كل اللي عمله معاه قالي تعالي وهنرفع عليه قضية خلع وفعلًا روحت عند بابا ورفعنا قضية خلع بقالنا 3 شهور ولسه مستنين الحكم".
