ولاء في دعوى طلاق: بقى همجي وخايفة على العيال منه
10 سنوات من الذل والإهانة تحملتها الزوجة من أجل الحفاظ على عش الزوجية وأنها لا تريد سوى تربية أولادها في سعادة لذلك كانت تتغاضى عن أفعال وتصرفات كثيرة تصدر من الزوج ولكن مع تماديه لم تتحمل كثيرًا ورفعت دعوى طلاق لتحظى بحياة أخرى سعيدة هي وأولادها.
"مطلع عيني أنا والعيال" كانت هذه الكلمات الأولى لـ ولاء وهي تروي قصتها للقاضي، مؤكدة على معاناتها مع زوجها من قبل الزواج، أضافت: "طول فترة الخطوبة كان كويس معايا جدًا وبيعاملني أحسن معاملة وكنت فاكرة هيفضل كدا بعد الجواز، بس اتصدمت من أسلوبه معايا من أول شهر في الجواز".
تابعت: "كان مفهمني إنه مبيشربش مخدرات بس لما اتجوزنا لقيته بيسهر برا كتير وبيرجع لي أخر الليل وهو شارب ولما قلت له مش انت مبتشربش مخدرات قالي أنا حر أعمل اللي أنا عايزه وانتي ملكيش دعوة".
يتمادى الزوج في تعاطي المخدرات
ظنت الزوجة أنها فترة مؤقتة ولكنها أدركت أنه يتعاطى المخدرات بطريقة مفرطة ما أدى لنشوب الخلافات والمشكلات بينهما بسبب ضرب الزوج للزوجة والأولاد، أضافت: "بقى بيتعصب عليا طول الوقت ولو كلمته في أي حاجة يزعق لي ويعمل خناقة كبيرة، كنت بقول مش مشكلة وبعدي عشان مخربش البيت"، تابعت: "لما خلفت قلت معاملته هتتغير ويبقى أهدي ويخلي باله من معاملته مع العيال، بس لقيته العكس وبقا يتعصب برضو على العيال ويضربهم على أي حاجة".
كانت لا تهتم الزوجة لأي شيء سوى أنها تربي أولادها دون التركيز مع زوجها ولكن الوضع لم ينجح لأنها فشلت في التعامل معه، أضافت: "كنت بحاول أخلي العيال بعيد عنه طول الوقت عشان ميضربهمش ولا يعمل فيهم حاجة بس في يوم كنت برا بجيب حاجات وهما كانوا في البيت ورجعت لقيته ضارب الواد والبت ومبهدلهم أخر بهدلة".
دعوى طلاق
تابعت: "مقدرتش استحمل ضربه للعيال، خدتهم ومشيت روحت عند أهلي ومن ساعتها قررت إن أنا اتطلق عشان أخلي بالي من العيال واعيشهم من غير ضرب وإهانة، طلبت الزوجة الطلاق ولكن الزوج رفض ما جعلها تلجأ لمحكمة الأسرة وترفع دعوى طلاق منذ شهرين ولا تزال القضية منظورة في المحكمة حتى الآن.
تابع أحدث الأخبار عبر
