ألفت في دعوى نفقة: «مش عاوز يصرف عليا ولا عايز يطلقني»
20 عام من الهنا والاستقرار والسعادة التي تغمر عش الزوجية بين الزوجين بسبب زوج متفهم يرعى أولاده ويعمل من أجلهم وزوجة تربي أولادها بكل رضا دون حدوث أي مشكلات ولكن فجأة تبدل الزوج وأصبح شخص غير مسئول لا يريد الانفاق على بيته وأولاده ما دفع الزوجة لرفع دعوى نفقة لتأخذ حق أولادها الأربعة.
تحول الزوج المفاجئ
"مش عايز يطلق" بهذه العبارة بدأت ألفت حديثها تروي قصتها السعيدة طوال الـ 20 عام مع زوجها التي تحولت في أخر 3 سنوات لتعاسة بسبب تحول الزوج لشخص أخر لا تعرفه، و"متجوزة بقالي 20 سنة وحياتنا كانت زي الفل جوزي محترم جدًا وبيعملنا كل اللي إحنا عايزينه أنا والعيال من غير ما حتى نطلب، فجأة بدون أي مقدمات اتحول لشخص تاني مش فاهمة إية اللي حصله".
تابعت: "جه في أخر 3 سنين مش عايز يصرف ولا عليا ولا على العيال وكل لما أكلمه على المصاريف يقولي مش معايا أعملك إيه، في الأول كنت بقول يمكن ظروف شغله بس بما لقيت الموضوع زاد يبقى أكيد في حاجة".
الشكوك تراود الزوجة
تعجبت الزوجة من تصرف الزوج وأنه لا يريد الانفاق على أولاده وعندما تمادى الزوج في رفضه لإنفاق أي مصاريف بدأت الزوجة تشك في الأمر وتريد التوصل لسبب تغيره معاها هي والأولاد، أضافت: "بقا ينزل كل يوم ويسيبني أنا والعيال من غير أكل وكل لما أكلمه أقوله عيالك عايزين يأكلوا يقولي أكليهم أي حاجة عايزة فلوس ليه".
تابعت: "تغير دا مبقاش مريحني قلت يمكن يعرف واحدة تانية عليا ،وهي اللي مخلياه مبصرفش عليا وعلى العيال، مسكت الموبايل وفتشته ملقتش أي حاجة، بقيت هتجنن مش عارفة هو اية اللي غيره كدا".
أكملت ألفت حديثها: "لما بقا يسيبني كتير أنا والعيال ومبيسبش أكل سيبت البيت ومشيت أنا وهما وروحت عند أهلي وطلبت منه الطلاق بس هو رفض، أهلي كلموه طب ابعت أي مصاريف لعيالك يقول لا مش هبعت حاجة".
كررت الزوجة طلبها برغبتها في مصاريف لأولادها ولكنه في كل مرة يرفض، ما دفعها تلجأ لمحكمة الأسرة بالجيزة ورفع دعوى نفقة عليه عندما سئمت منه، ولا تزال القضية منظورة في المحكمة حتى الآن.
تابع أحدث الأخبار عبر
