أخبار محكمة الأسرة اليوم
سمية لـ محكمة الأسرة: ضربني بالدفاية في الشتا عشان راحت عليه نومه
دعوى خلع ونفقة رفعتها «سمية» على زوجها في محكمة الأسرة وكان سيي رفعها الدعاوى هو قسوة قلب زوجها و تحكماته الغير منطقية التي تحملتهم الزوجة منذ زواجها منه وبعد تحملها له لسنين عديدة كان جزائها هو ان تطرد من بيتها لتجد نفسها وحيدة على أبواب محكمة الأسرة تبحث عن حقوقها.
قصص محكمة الأسرة..من ساعة ما اتقدملي وأنا عرفته
قالت «سمية» في بداية حديثها: «أنا متجوزة من 11 سنة وعندي من جوزي بنت وولد، كان جواز صالونات، عرفني من ناس معرفة واتقدملي بعد ما قالوا عليا إني كويسة، ومن ساعة ما اتقدملي وطول فترة الخطوبة بانت عليه حقيقته إنه بني أدم تحكماته كتير وبيطلب ويتأمر ومفيش حاجة بالرغم من كدة وافقت عليه عشان خاطر مكسرش فرحة أهلي».
دعاوي محكمة الأسرة..ياريت المشاكل فضلت الفلوس بس
أكملت كلامها قائلة: « كان بني أدم بتاع مشاكل ومفيش حاجة بتعجبه، طول الوقت مشاكل بسبب ومن غير سبب، مكنش بيصرف عليا اللي يكفيني أنا والولاد وأهلي هما اللي كانوا بيساعدونا، ياريت المشاكل معاه فضلت معاه على الفلوس بس، الحياة معاه كانت صعبة ومحدش يستحملها».
حكايات محكمة الأسرة
تابعت حديثها قائلة: «كان طول الوقت ضرب وإهانة بسبب ومن غير سبب، كان بيضربني بقسوة طول الوقت لو طلبت منه حاجة أو مطلبتش، كانت تحكماته غريبة مبيبقاش عايزني أدخل الحمام ولا اعمل أكل ولا شرب وأنا بخدمه عنده أهم حاجة نفسه أولا دي بيقولها طول الوقت، مش عايزني أهتم بالعيال ولا يهتم بيهم،كان بيضرب ابني ومبيضربش البنت بيضربه بقسوة في راسه وفي كوعه لما بيغلط بيضربه ضرب عنف ».
قضايا محكمة الأسرة.. قضية خلع ونفقة
أنهت حديثها قائلة: «كان في مرة ضربني في وشي وأنا بدعكله رجله عشان سيبته دقيقة واحدة بس أعمل حاجة تاني بهدلني، أخر مشكلة حصلت ضربني في الشتا بالدفاية عشان أتأخر في الشغل وأنا مصحتهوش، ضربني وشدني زحف لحد اوضة ولادي عورني في راسي، بنتي هي اللي كانت بتمسح الدم اللي في الصالة مسيبتش البيت عشان خاطر ولادي ودروسهم، واخرتها طردني بعد وفاة أمي ب 6 شهور ورفعت عليه قضية خلع ونفقة ».