أخبار محكمة الأسرة
إسراء لقاضي محكمة الأسرة : بيهددنى بخطف بنتي
تزوجت إسراء وكان حلمها أن تدخل القفص الذهبي مع من اختارته وتنجب منه اطفال وتنشئ اسرة، لكن واقعها كان مختلف تماما عن أحلامها بعد انجابها طفلتها ظهر الوجه الحقيقي لزوجها الذي دمر احلامها ودمر فرحتها، وجعلها تهرب لمحكمة الأسرة حتى تجد حل لمشكلتها معه وتنقذ ابنتها من تهديداته بخطفها.
قصص محكمة الأسرة..مسألناش عليه هو وأهله قبل الجواز
قالت «إسراء» في بداية حديثها :«أنا اتجوزت جاري من ٣ سنين، اتقدملي بعد ما خلصت جامعة على طول وكنا عارفبن أهله وعارفينهم من زمان، ده اللي خلاني اوافق عليه على طول أنا وأهلي، مسألناش عليهم قبل الجواز ودي غلطتنا».
دعاوي محكمة الأسرة..طلع بيضحك عليا في الخطوبة
أكملت «إسراء» حديثها وقالت: «المشاكل بينا كانت من ساعة الخطوبة بس كانت بتتحل، بعد الجواز المشاكل زادت وكانت بتبقى على المصاريف وعلى حجات تانية كتير وأنا كنت بعدي عشان الدنيا تمشي وميحصلش مشاكل، وبدأ يبان عليه ان الشخص بتاع الخطوبة ده واحد تاني».
حكايات محكمة الأسرة.. بتحايل عليه عشان يصرف علينا
تابعت «إسراء» حديثها قائلة: «بعد من سنة تقريبا خلفت بنتي ومن ساعتها المشاكل كترت عن زمان هو واهله مكانوش عايزين بنات وهو اصلا كان بتاع مشاكل، بقى يتخانق معايا طول الوقت ومش عايز يصرف جنية واحد على البنت ولا حتى عليا ومهما اتحايل عليه يقولي ده اللي عندي اذا كان عاجبك».
قضايا محكمة الأسرة..عايزاه بس يسيبنا في حالنا
أنهت «إسراء» حديثها قائلة: «حاولت اكلم اهله عشان حد منهم يلحقني بس محدش وقف جنبي، لحد ماهو بقى مع كل مشكلة يهددني انه هياخد بنتي مني ومش هيخليني اشوفها من بعد ما تتفطم، وبيقولى هخليكى عديمه الأهلية ومتنفعيش تاخدي بالك منها، تعبت جدا منه وبقيت عايشة في رعب طول الوقت انه يخطف البنت مني، لحد ما أهلي خدوني أنا وبنتي ورحت قعدت عندهم، وهو ما صدق خلص مننا بس كل شوية يكلمني يعمل معايا مشكلة ويهددني، لحد ما جيت المحكمة ارفع عليه قضية خلع ونفقة وانا كدة كدة الحضانة معايا، مش عايزة منه حاجة غير يسيبنا في حالنا».