أخبار محكمة الأسرة اليوم
سلوى لـ محكمة الأسرة : ولاد جوزي سرقوا حق بناتي
وصلت سلوى لأبواب محكمة الأسرة بسبب أولاد زوجها الذي استغلوا وفاة والدهم وسرقوا حق أخواتهم بحجه أنهم بنات ولا ورث لهم، وكانت فعلتهم نتيجة كره متراكم منذ سنين عديدة بسبب أن سلوى كانت زوجة ابيهم وليس أمهم وبالرغم من معاملتها الطيبة معهم ما وجدته منهم القسوة والغدر، حتى اشتكت في محكمة الأسرة حتى تحصل على حقوقها.
قضايا محكمة الأسرة..أنا كنت الزوجة التالتة لجوزي
بدأت «سلوى» حديثها وقالت: «أنا جوزي متوفي من شهر 5 السنة اللي فاتت، أنا كنت مراته التالتة، اتجوزته وخلفت منه 3 بنات، كنت عارفة إنه اتجوز اتنين قبلي قبل كدة وكنت موافقة عادي، ومن ساعة ما اتجوزته مشوفتش منه حاجة وحشة كان راجل زي باقي الرجالة، بيحصل خناقات وبنتصالح عادي والدنيا كانت ماشية».
دعاوي محكمة الأسرة..طلق مراته التانية عشان بتاعت مشاكل
أكملت «سلوى» حديثها وقالت: «مرات جوزي الأولى كانت مبتخلفش ودلوقتي كبيرة في السن، عشان كدة اتجوز عليها التانية وبعدما اتجوزها وخلف منها ولدين، لقاها بتاعت مشاكل عشان كدة اتجوزني وبعد جوازنا مشاكلها كترت وبقت كل مادى بتكتر عن الأول، لحد ما جوزي زهق منها وطلقها، أنا مكنش ليا علاقة بطلاقها ولا علاقة بأي واحدة فيهم».
حكايات محكمة الأسرة..ولاد جوزي سرقوا حق بناتي
تابعت «سلوى» حديثها قائلة: «بعد وفاة جوزي المشاكل بدأت وكانت مبتخلصش، ولاد جوزي من مراته التانية خدوا كل الحجات اللي كان جوزي كاتبها لبناتي قبل ما يموت ولما حاولت اتفاهم معاهم وأحل المشكلة ما بينا قالولي دول بنات وملهمش ورث عندنا».
قضايا محكمة الأسرة.. واخدين حقي أنا وبناتي
أنهت «سلوى» حديثها قائلة: «هما بيكرهوني لأن أمهم مفهماهم إني سبب طلاقهم بس ده مش صح ومحصلش وأنا عمري ما كنت وحشة معاهم، لكن هما الطمع والكره عماهم وخلاهم مش شايفين غير نفسهم وبس، حاولت مع كل الناس أنها تتدخل وتحل المشاكل اللي حصلت لكن مفيش فايدة معاهم واخدين كل حاجة تخصني انا وبناتي وبيقولوا ملناش حق، لحد ما اضطريت أرفع قضية إعلام وراثة عشان أعرف أخد حق بناتي».
تابع أحدث الأخبار عبر
