هالة لـ محكمة الأسرة : 20 سنة قهر ومشوفتش حياتي غير بعد ما سيبته
بعد 20 سنة زواج كانت محكمة الأسرة هي النهاية التي وصلت لها «هالة» وهي تندم أشد الندم على عدم أخذ هذه الخطوة منذ سنين عديدة، كان زوجها رجل لم يصون زوجته طوال سنين زواجهم ولم يعطيها حقوقها من أموال أو معاملة حسنة واستمر هذا الوضع حتى بعد انفصالهم، حنى اضطرت الزوجة أن ترفع عليه دعاوي في محكمة الأسرة
هالة لـ محكمة الأسرة : 20 سنة قهر ومشوفتش حياتي غير بعد ما سيبته
قصص محكمة الأسرة..كل واحد فينا كان عايش في بيت
قالت «هالة» في بداية حديثها: «أنا متجوزة بقالي 20 سنة اتجوزت وأنا صغيرة وجوزي كان قريبي من بعيد، خلفت منه 3 أولاد أكبر واحد في ثانوي والتانية في اعدادي والصغير في ابتدائي، وسايبة جوزي دلوقتي بقالي 5 سنين الأول كنا منفصلين كل واحد عايش في البيت وبعد كدة اتطلقنا».
دعاوي محكمة الأسرة..بيصرف على نفسه بس
أكملت «هالة» حديثها وقالت: «الحياة بيني وبينه كانت عادية جدا زي اي اتنين فيه بينهم مشاكل، ده اللي كان مصبرني عليه بقول عادي البيوت كلها فيها مشاكل، بس هو كان بني ادم صعب وعمايله أصعب كان مبيحبش حد قد نفسه فلوسه يصرفها عليه هو لا بيته ولا عياله حياتي معاه كان كلها قهر، مشفتش حياتي غير بعد ما سيبته هو كان مقعدني في البيت وبعدما سيبته اتعلمت واشتغلت وبقيت ادرس وحياتي بقت احسن».
حكايات محكمة الأسرة.. مبيسألش فينا وسايبنا للمحاكم
تابعت «هالة» حديثها قائلة: «لحد ما حصل بينا مشكلة كبيرة وساعتها قررت إني زهقت ومش عايزة افضل عايشة معاه، سيبت البيت ومتطلقناش وساعتها رفعت قضية النفقة، لأنه أجر شقة وسابنا وبقى مبيصرفش قلت يدفع ودي لكنه رفض وقالي عندك المحاكم، وفعلا بقيت اخد منه النفقة بالمحكمة، وأول ما رفعت زيادة نفقة طلقني».
قضايا محكمة الأسرة..مش عايز يدفع 500 جنية
أنهت «هالة» حديثها قائلة: «طول السنين دي انا مرفعتش الزيادة غير مرة واحدة بس لما كان كل عيل ليه 300 جنية رفعت قضية وزادت النفقة ل500 بس، وهو اللي قدر عليه إن أول ما طلع معاش رفع قضية تخفيض نفقة مع إني باخد قليل أصلا لكل عيل وبحاول دلوقتي أرجع حق ولادي واخدلهم نفقة تكفيهم».