أخبار محكمة الأسرة اليوم
«عايش من خيري».. ثرية لـ محكمة الأسرة: مخليني أصرف عليه وبيساومني في المؤخر
لم تكن تتوقع «ثرية» عندما أقدمت على الزواج مرة أخرى بعد وفاة زوجها الأول أن محكمة الأسرة ستكون النهاية التي تصل إليها بعد رفض زوجها أن يطلقها بشكل ودي وأن يصرف عليها ما تحتاجه، كل ذلك بسبب خوفه من تحمل مسؤولية بناتها من زوجها الأول واضطرت الزوجة أن تتوجه لمحكمة الأسرة حتى تحصل على حريتها وحقوقها.
قضايا محكمة الأسرة.. اتجوزت قريبي يكون ضهر وسند ليا
بدأت «ثرية» حديثها وقالت: «أنا متجوزة من 3 سنين مش معايا أولاد من جوزي، كان جوازتي التانية بعد ما جوزي الأول أبو بناتي اتوفى، أنا وهو كنا قرايب وانا مكنتش عايزة اتجوز بس قلت اتجوز يبقى ليا في الدنيا ضهر وسند».
دعاوي محكمة الأسرة.. مبيصرفش عليا ومخليني أصرف عليه
أكملت «ثرية» حديثها وقالت: «جوزي الأول أبو ولادي اتوفى بأزمة قلبية وأنا اتجوزت بعدما مات بسنتين ونص، اتجوزت وسيبت بناتي لأنهم كانوا كبار ويقدروا يعتمدوا على نفسهم، ومن ساعة ما اتجوزت والمشاكل معاه من زمان كانت كتيرة جدا، بس معظمها كانت بسبب المصاريف وانه مبيصرفش خالص عليا ومخليني أصرف عليه».
حكايات محكمة الأسرة..مبيصرفش وأسلوبه أوحش من الضرب
تابعت «ثرية» حديثها قائلة: «أول الجواز كان بيصرف عادي ومفيش مشاكل، لكن بعد فترة بقى مبيصرفش واتغير بقت معاملته وحشة جدا كان بيزعق ويشتم معاملته أوحش من الضرب، مكنتش فاهمة بيعمل كدة ليه بس بعد كدة فهمت إنه لما شافني جبت بناتي يسمنوا جنبي خاف إني أخليه يصرف عليهم ويشيل مسؤليتهم، مع إني عمري ما طلبت منه حاجة ليهم».
قضايا محكمة الأسرة.. مش عايز يطلق ولا يصرف
أنهت «ثرية» حديثها قائلة: «مكنش بيضربني بس وراني الويل واللي أوحش من الضرب استحملته بس بعد كدة العيشة بقت صعبة ومقدرتش اتحمل أكتر سيبتله البيت ورحت فعدت مع بناتي ومن ساعتها مسألش عشان خايف أطلب منه مصاريف، ودلوقتي اضطريت إني أجي المحكمة ورافعة عليه قضية نفقة زوجية، عشان هو مش عايز يطلق ولا عايز يديني فلوس مصاريف، عايزني أتنازل عن المؤخر وحقوقي كلها عشان يرضى يطلقني».