أخبار محكمة الأسرة اليوم
لمياء لـ محكمة الأسرة : استحملت البهدلة سنين وأول ما تعبت رماني
كانت لمياء في محكمة الأسرة بعد سنين من الشقاء والمعاناة عاشتهم مع زوجها الذي تزوجته عن حب وانفصلت عنه بسبب بخله عليها ، وعلى أولادها بأمواله وبحبه لهم، منذ زواجها وكانت تعمل لمياء لتكفي بيتها وأسرتها، وعندما أصابها المرض ما وجدته من زوجها هو الغدر والقسوة عليها، وفي النهاية اضطرت أن تشتكيه في محكمة الأسرة.
قصص محكمة الأسرة..اتعرفت على جوزي عن طريق الشغل
قالت «لمياء» في بداية حديثها: «أنا متجوزة بقالي 30 سنة ، وخلفت من جوزي ولدين وبنت، ولادي كبار البنت دلوقتي متجوزة والولد الكبير كاتب كتابه والصغير عايش معايا ، أنا وجوزي مكناش قرايب هو كان معايا في الشغل اتعرفنا على بعض وحبينا بعض واتقدملي بعدها اتجوزنا».
حكايات محكمة الأسرة..جوزي راجل بخيل
تابعت «لمياء» حديثها قائلة : «جوزي كان بخيل جدا من زمان وكان بيبقى معاه فلوس ومكنش بيصرف جنية عليا أو على الولاد، بس أنا كنت شغالة وبصرف مكانه وبكمل في الحجات اللي هو مقصر فيها والدنيا كانت ماشية ومكنتش برضى أعمل مشاكل عشان مخربش بيتي».
دعاوي محكمة الأسرة.. المشاكل من بعد ما قعدت من الشغل
أضافت «لمياء»: «سبب الانفصال بيني وبين جوزي كان المشاكل الكتير اللي ابتدت معاه من 2019، وقتها أنا كنت تعبانة وقعدت من الشغل لأني مبقتش أقدر أنزل أو اشتغل، وبدل ما يخلي باله مني أنا و من العيال، عمل معايا مشاكل كتير وبهدلني ومكنش بيرضى يجبلي العيال أو يشوف محتاجين ايه، وخلاني اضطرت إني اسيبله البيت، أنا اتحملته كتير لكن هو مفيش فايدة معاه وعمره ما هيتغير».
قضايا محكمة الأسرة... رافض الطلاق الودي
أنهت «لمياء» حديثها قائلة: « دلوقتي منفصلة عنه بقالي 4 سنين، ورافعة قضية الخلع بقالي 3 شهور، لأنه رافض الطلاق الودي وكان عايز نرجع تاني بس خلاص أنا صبرت عليه سنين عشان كنت شغالة وكله كان بيقولي معلش عشان العيال صغيرة لكن دلوقتي ولادي كبروا وانا اديت رسالتي ومش مضطرة استحمل ولما ارجع مين هيصرف ومين هيمشي البيت وأنا أصلا مبقتش قادرة».