أخبار محكمة الأسرة اليوم
محكمة الأسرة .. سلوى: بقفشه كل فترة مع واحدة جديدة
تزوجت سلوى ولم تتوقع أن تكون محكمة الأسرة هي نهايتها هي وزوجها الذي اختارته أن يكون شريك حياتها ووالد أطفالها، وبدل أن يكون الزوج سندها وضهرها في الدنيا كان مصدر الغدر والخيانة في حياتها وحول حياتها لجحيم دائم، عندما علمت الزوجة بخيانة زوجها أول مرة حاولت أن تتخلص من حياتها معه وتتركه لكن رفض زوجها أن يتركها وحدها وتعيش حياة طبيعية بدونه وظل ورائها حتى عادت له لتكتشف أن الخيانة في طبعه ولن يتغير أبدا.
قصص محكمة الأسرة.. سيبت جوزي بسبب خيانته
قالت «سلوى» في بداية حديثها: «أنا كنت متجوزة جواز صالونات من 8 سنين معايا من جوزي ولدين، مكنتش أعرفه قبل الجواز كويس، وسايبين بعض دلوقتي بقالنا فترة بسبب خيانته».
حكايات محكمة الأسرة.. عملت نفسي مش واخدة بالي من خيانته
تابعت «سلوى» حديثها قائلة: «بقالي سنين في مشاكل كتير معاه بسبب الستات، كنت شاكة فيه من زمان بس مكنش عندي دليل على شكي فيه أو إنه يعرف ستات ولا لا، كبرت دماغي وعملت نفسي مش واخدة بالي عشان مخربش بيتي وعيالي ميتبهدلوش».
دعاوي محكمة الأسرة.. قفشته مع واحدة وبلغت عنه
أضافت «سلوى»: «لحدما قفشته مع واحدة وبعدها اتحبس لما بلغت عنه ومرجعش تاني، مكنتش أول مرة اقفشه مع واحدة لكن أول مرة هربوا هما الإتنين والبوليس معرفش يجبهم، بس بعد أول مرة قفشته سيبته وقتها ومكنتش هرجعله تاني لكن هو رجع واتحايل عليا إنه يرجعلي وإنه اتغير ومش هيعمل كدة تاني وافقت أرجع عشان مكنتش عارفة أغضب وأسيب البيت والعيال كانول هيتبهدلوا، قعد 3 شهور كويس وبعد كدة رجع تاني ».
قضايا محكمة الأسرة.. رفعت عليه قضية خلع بعد ما حبسته
أنهت «سلوى» حديثها قائلة: «تاني مرة لما عرفت إنه مع واحدة عرفت من الناس شافوهم وكلموني قالولي جوزك مع واحدة في بيتك وكنت وقتها عند أهلي، بلغت عنه واتحبس من وقتها ومطلعش، لسه دلوقتي جاية عشان أرفع قضية خلع وهو دلوقتي لسه محبوس ومطلعش وميعرفش إني رفعت عليه قضية حتى وأنا خلاص مش عايزاه ولا عايزة أكمل معاه».