أخبار محكمة الأسرة اليوم
أروى لـ محكمة الأسرة : رحت أعمل قسيمة جواز لقيته اتنين على ذمته
توجهت أروى لأبواب محكمة الأسرة تبحث عن حقوقها بعد خيانة زوجها لها واكتشافها زواجه من سيدتين غيرها دون علمها، تزوجت أروى زواج صالونات وكانت حياتها هي وزوجها طبيعية دون مشاكل سوى الطبيعية وكانت تظن أن حياتها مع زوجها ستكون طبيعية لتكتشف أن زوجها تزوج عليها بدون عملها وعندما واجهت الزوج طردها من بيتها حتى وصلت لأبواب محكمة لترفع دعوى أجر مسكن في محكمة الأسرة بعد طرده لها.
قصص محكمة الأسرة.. اتجوزت جواز صالونات
قالت «أروى» في بداية حديثها: «أنا اتجوزت جواز صالونات من 11 سنة، معايا ولد وبنت من جوزي، ولادي عايشين معايا أنا وجوزي وانا وهو منفصلين بقالنا 4 سنين، لما اتقدملي كان مناسب وعادي ومكنش يبان عليه إن ممكن يعمل اللي عملوا معايا ده».
حكايات محكمة الأسرة.. بساعده في مصاريف البيت وشكيت فيه بيخوني
تابعت «أروى» حديثها قائلة: «الحياة في الأول كانت عادية ومفيش مشاكل، كان فيه بينا مشاكل على المصاريف بس، أنا كنت بعدي وبشتغل وبصرف على البيت اللي محتاجه عشان أساعده على المصاريف، والحياة كانت ماشية لحد ما شكيت في جوزي إنه بيخوني بس مقدرتش أثبت حاجة».
دعاوي محكمة الأسرة.. اكتشتف جوزي متجوز واحدة قبلي وواحدة بعدي
أضافت «أروى»: «لحد ما سيبت جوزي من 4 سنين، سيبته لأنه اتجوز عليا واحدة تانية أنا كنت شاكة أنه متجوز وعرفت لما دورت وراه أنه متجوز، سيبنه على طول ورفعت قضية تمكين عشان أعرف أخد حقي في الشقة، وكان متجوز قبلي وأنا معرفش أنا رقم اتنين في التلاتة، عرفت باللي متجوزها قبلي لما جيت أطلع قسيمة جواز لقيته متجوز واحدة قبلي ومخلف منها ومكنتش أعرف ».
قضايا محكمة الأسرة.. رافعة قضية أجر مسكن لأنه باع الشقة
أنهت «أروى» حديثها قائلة: «بعد لما عرفت أنه متجوز ورفعت عليه قضية التمكين واتحكملي بالتمكين من الشقة هو طلعني منها وباعها وأنا قاعدة فيها أنا والعيال، عشان يعاقبني أني رفعت عليه القضية كل ده ومحصلش طلاق لسه، دلوقتي رفعت عليه قضية أجر مسكن من 30/7 اللي فات».