أخبار محكمة الأسرة اليوم
محكمة الأسرة .. أميمة: حرمني من كل حقوقي ومش مخليني أشوف ولادي
كانت محكمة الأسرة النهاية التي وصلت لها «أميمة» بعد سنين المعاناة التي عاشتها مع زوجها الذي لم يقدرها أو يحترمها طوال سنين زواجهم، وملأ حياتها بالألم والقسوة والإهانة ولم يصون زوجته أو أبنائه، واستمر الزوج في قسوته على زوجته وعلى أبنائه حتى طرد زوجته من بيتها وحرمها من أبنائها ومن حقوقها كاملة، وأوصل «أميمة» بقسوته لمحكمة الأسرة حتى تجد حل لمشاكلها مع الرجل الذي لم يتسم بالرحمة أبدا.
قصص محكمة الأسرة.. المشاكل مع جوزي من زمان
قالت «أميمة» في بداية حديثها: «أنا متجوزة من 19 سنة، معايا من جوزي 3 أولاد، شفت مع جوزي طول سنين جوازنا البهدلة والإهانة عمره ما كان حنين عليا أو على العيال، كان جوازتقليدي والمشاكل والخلافات معاه كانت من ساعة ما اتجوزنا».
حكايات محكمة الأسرة .. استحملته عشان مخربش بيتي
تابعت «أميمة» حديثها قائلة: «سنين معاه عصبي وبيبهدلني ويضربني في كل خناقة بينا اتحملته عشان مكنش ينفع أطلق أهلي كانوا مش هيرضوا بحاجة زي كدة صبرت عليه واتحملته كتير عشان خاطر العيال ومخربش بيتي».
دعاوي محكمة الأسرة.. طردني من غير هدومي وخد مني ولادي
أضافت الزوجة: «لحد أخر مشكلة بينا طردني من الشقة من غير هدومي خد كل حاجة، حتى ولادي خدهم، وقتها قلت مش هرجعله تاني خلاص، ورفعت عليه قضية خلع، سيبتله كل حاجة وقلت مش مشكلة أسيب العفش عشان ولادي يعيشوا عليه وأنا رحت عند أهلي، خد مني كل حقوقي مسابليش حاجة خالص».
قضايا محكمة الأسرة.. حارمني من ولادي ومن حقوقي
أنهت «أميمة» حديثها قائلة: «مش مخليني أشوف ولادي خالص بقالي 6 شهور سايباه ومش عارفة أوصلهم أو حتى أطمن عليهم، بعد ما وعدني أنه هيخليني أشوفهم قالي ملكيش عندي حاجة واعتبري عيالك ماتوا، حاولت بالتراضى إني أحل المشاكل اللي بينا وأقدر أخد ولادي لكنه رفض نهائي لإنه عنيد، لحد قريب مرضيتش أرفع عليه أي قضية بحقوقي اللي واخدها أو ولادي اللي مانعهم عني عشان ميتحكمش عليه بأى حكم وأولادى اللى يدفعوا التمن، بس رفعت قضية رؤية عشان أقدر حتى أشوفهم وأطمئن عليهم».