نهى في دعوى نفقة: مش راضي يديني جنيه وسايبنا نأكل جبنة قديمة أنا والعيال
لجأت نهى لرفع دعوى نفقة بسبب رفض الزوج الإنفاق على أولاده، وبالرغم من محاولاتها معه لكنها فشلت بسبب أنه يصر على عدم الإنفاق على الأولاد ما جعلها تطلب الطلاق والذهاب بعيدًا هي وأولادها، وكانت تظن أن الفراق يجعله يحن قلبه على أبناءه ولكن عندما طلبت منه مصروفات لإطعام الأولاد رفض.
بخل الزوج على زوجته وأولاده
"مش راضي يصرف علي أنا والعيال" هذه أول عبارة بدأت بها نهى حديثها وهي منفعلة حزنًا على أولادها بسبب ما فعله الأب بهم، أضافت: "من أول الجواز وهو بيصرف بالعافية ويصرف قليل جدًا كنت بقول معلش مش مشكلة فترة وتعدي ولسة في الأول وما نخلف الوضع هيختلف".
تابعت: "لما خلفنا لقيته زاد ومبقاش عايز يصرف ولا علي ولا على العيال، حصلت خناقات بينا وأهلي اتدخلوا واتكلموا معاه وفهموه إنه مينفعش كدا ولازم يصرف عليهم دول عياله مش عيال من الشارع".
فشلت كل محاولات الزوجة
صبرت الزوجة سنوات طويلة على هذا الحال من أجل تغيير الزوج ولكن كل المحاولات كانت تفشل ومع كل محاولة كانت تفكر في الانفصال ولكنها كانت تضع أولادها أولوية أمامها في كل مرة من أجل الحفاظ على عش الزوجية ولكن فاض بها الكيل وقررت أن تنفصل وتذهب هي وأولادها، أضافت: "كل مرة كنت ببقى عايزة اتطلق بس كنت بقول لا عشان العيال ومينفعش أخرب البيت وهو مسيره هيتعدل بس مفيش فايدة بقيت بروح أكل عند أهلي كل يوم عشان مفيش أكل في البيت وهو ولا همه".
تابعت: "طلبت منه الطلاق رفض وقال لي ابريني وأنا أطلقك، وبريته فعًلا عشان مكنتش عايزة حاجة غير إني أمشي أنا والعيال واعيشهم كويس"، أكملت نهى: "اتطلقت وخدت عيالي وروحت أجرت شقة صغيرة لينا ونزلت اشتغل عشان أعرف اصرف عليهم، بس مصاريفهم كتير ومش عارفة اكفي كل المصاريف".
دعوى نفقة
طلبت الزوجة مصروفات من الزوج للأولاد وكلها أمل أن يرق قلبه على أولاده ولكنه رفض أن يعطيها ولو جنيهًا واحدًا ما دفعها تلجأ لمحكمة الأسرة ورفع دعوى نفقة على زوجها من أجل أولادها.
أنهت الزوجة حديثها: "الفلوس اللي بشتغل بيها بدفعها للإيجار والكهرباء والميه ومش لاقين فلوس نأكل بيها، بنأكل أنا وعيالي جبنة قديمة بس ولما طلبت منه فلوس عشان خاطر العيال قالي مش هديكي جنيه واحد"، لجأت نهى لرفع دعوى نفقة على زوجها منذ 3 شهور بسبب رفضه الإنفاق على أولاده، ولا تزال القضية منظورة في المحكمة حتى الآن.