أخبار محكمة الأسرة اليوم
رانيا بدعوى نفقة: كدب عليا في عمره الحقيقي واستحملت لكن بُخله عدا الحدود
رفعت «رانيا» دعوى نفقة في محكمة الأسرة على زوجها الذي كذب عليها منذ زواجه منها وأقنعها أنه صغير السن لكن في الحقيقة كان الزوج أكبر منها بـ 20 عامًا، ومنذ زواجها منه كانت الحياة معه مؤلمة بسبب أهل الزوج الذي لم يقدروا زوجة أبنهم ولم يعاملوها معاملة حسنة واتبع الزوج طباع أهله، وبعد سنين المعاناة توجهت الزوجة لمحكمة الأسرة لترفع قضايا لتستطيع أخذ حقها بها.
قصص محكمة الأسرة..كداب مقاليش إنه أكبر مني
قالت «رانيا» في بداية حديثها: «أنا متجوزة من 11 سنة وكان عندي 16 سنة لما اتجوزت وجوزي كان أكبر مني بـ 20 سنة وأنا معرفش كان كداب لما اتقدملي مقاليش إنه أكبر مني بكتير وقالي أنه أصغر من كدة، لكن وقت الجواز اكتشفت الحقيقة، مكنتش أعرفه كويس قبل الجواز هو شافني وأعجب بيا واتجوزنا وخلفت منه عيلين».
دعاوي محكمة الأسرة.. بقالي 11 سنة في بهدلة
أكملت «رانيا» حديثها وقالت: «المشاكل معاه من أول ما اتجوزت بقالي 11 سنة في بهدلة، كنت ساكنة بعيد عن أهله وكنت بروح بيت أمه أخدم وفي الأخر متشكرتش، أهله كانوا بيضايقوني ويغلطوا فيا وهو بيمشي على كلامهم ومش بيقف معايا أبدا».
حكايات محكمة الأسرة.. اطلقت مرتين بسبب أهله
تابعت «رانيا» حديثها قائلة: «اطلقنا مرتين بسبب أهله وسيبت جوزي كتير بسبب عمايلهم، وبطلت أروحلهم عشان مشاكلهم كتير، هو بقى مبهدلني ضرب وإهانة بسبب ومن غير سبب، كان بيشرب مخدرات ومبيسألش فيا ولا في عياله، هو من زمان كدة بس أنا كنت صابرة عليه».
قضايا محكمة الأسرة.. معاه الفلوس ومبيصرفش
أنهت «رانيا» حديثها قائلة: «استحملته كتير لكن تعبت منه كان مبيفكرش غير في نفسه وبس، من زمان معاه الفلوس ويقول مش معايا، بيصرف على أهله ويجيب اللي نفسه فيه أنا والعيال ولو اشتكيت يقولي مش عاجبك أمشي، وجيت عشان أرفع عليه قضية نفقة عشان أعرف أخد منه حقي أنا لسه عايشة معاها ومسيبتش البيت وهو مش راضي يطلقني لأنها أخر طلقة ومش عايز يديني حاجة من حقوقي، عارف أني رافعة عليه قضية نفقة وهو عارف، ومش راضي يطلقني عند المأذون غير لما اتنازل عن النفقة رافعاها من سنتين ومبيدفعش».
تابع أحدث الأخبار عبر
