أخبار محكمة الأسرة
محكمة الأسرة.. سارة: بيعني الدهب في أول أسبوع جواز وفى الأخر طلقنى غيابي
وصلت «سارة» لأبواب محكمة الأسرة بعد ان خسرت جميع حقوقها وسرقها منها زوجها وكانت محكمة الأسرة هي حلها الأخير الذي لجأت له حتى تسترجع حقوقها التي سلبها منها زوجها الذي استغل أول خلاف كبير بينهم وطلقها غيابي دون مبرر أو سبب واضح، ولم يكفيه سرقة ذهبها أعطاهم لسيدة أخرى ولم يكن للزوجة حول أو قوة.
قصص محكمة الأسرة..جواز صالونات وميبانش عليه حاجة وحشة
قالت «سارة» في بداية حديثها :«انا متجوزة من ٣ سنين، كان جواز صالونات زي باقي الناس عادي، اتقدملي واتجوزنا وكان يبان عليه حد كويس وميبانش عليه حاجة وحشة وكان بيصرف ويشتغل عادي، وأهله ناس عادية ومكنش فيه مشاكل بيني وبينهم».
دعاوي محكمة الأسرة..بيعني دهبي بعد اسبوع جواز
أكملت «سارة» حديثها وقالت: «بعد الجواز بأسبوع واحد بس جوزي بيعني دهبي على اساس إن عليه ديون ومحتاج الفلوس ضروري وقتها مقدرتش اقوله لا اديته الدهب وباعه وكنت مستأمناه ومعرفش ان ممكن يغدر بيا، الدهب أصلا كان من ضمنه حجات ابويا اللي جايبهالي هدية».
حكايات محكمة الأسرة..طلقني غيابي وخد دهبي
تابعت «سارة» حديثها قائلة: «كان بيحصل بينا مشاكل بس كانت مش كتير او كبيرة، لحد في مرة حصل مشكلة وكانت كبيرة والأهالي ادخلوا وكانت أول مرة اغضب واروح عند أهلي وبعد ما غضبت بفترة طلقني غيابي وسابني، ولما جيت اخد حاجتي وحقوقي قال انا مخدتش منك دهب ولا خدت منك حاجة ».
قضايا محكمة الأسرة..مكنتش عايزة اصغره قدام الناس
أنهت «سارة» حديثها قائلة: «بعد ما وعدني ان الدهب اللي باعه هيرجعهولي اكتشفت بعد كدة انه كداب ومكنش عليه ديون ولا حاجة والدهب مباعهوش ولسه معاه، عرفت ان الدهب لسه موجود لأنه خطب وهيتجوز واللي خطبها اداها دهبي ولبسهولها، أنا مكنتش قايلة لحد تاني اني اديته الدهب لاني مكنتش عايزة اصغرة أو احرجه قدام حد ومفيش شهود معايا انه قال هيرجعهولي تاني، جيت ارفع قضية بالقايمة عشان اعرف اخد منه حقوقي لأن حتى عفشي وكل حاجتي واخدهم ومعرفتش اخد حاجة وناوي يتجوز عليهم واحد تانية».
تابع أحدث الأخبار عبر
