أماني لـ حكمة الأسرة : رفعت عليه قضية عشان يتعظ ويرجعني تاني
عكس العديد من السيدات في محكمة الأسرة كانت نية «أماني» عندما رفعت قضية على زوجها ليس فقط أخذ حقها بل حتى تلقنه درس وتجعله يردها لبيتها لكن حدث معها عكس ما توقعته فلم يسأل عليها واستمر في عدم صرف أموال عليها وعلى أبنائها واضطرت وقتها ان تكمل مسيرتها في محكمة الأسرة وترفع دعوى زيادة نفقة وهي في انتظار أن تعود لبيتها وتلم شمل اسرتها من جديد.
قصص محكمة الأسرة..مبانش عليه حاجة في أول الجواز ولا الخطوبة
قالت «أماني» في بداية حديثها: «انا متجوزة من5 سنين معايا منه ولد وبنت، كان جواز عادي زي اي اتنين مكناش قرايب ولا نعرف بعض قبل الجواز، لما اتقدملي كان كويس جدا نفيش حاجة بانت عليه في فترة الخطوبة أو أول فترة الجواز».
دعاوي محكمة الأسرة.. مكنتش بعمل مشاكل عشان مخربش بيتي
أكملت «أماني» حديثها وقالت: «بعد الخلفة المشاكل بينا زادت على المصاريف، كنت بعديله كل حاجة وبسكت ومش بعمل مشاكل عشان مخربش البيت، كنت حتى وأنا تعبانة مبطلبش منه العلاج وبتصرف وأخد من أهلي واجيب اللي محتاجاه أنا وولادي عشان معملش مشكلة، هو كان بيشتغل وبيصرف بس فلوس قليلة مش بتكفي حاجة وكنا بنضطر نستلف عشان نكفي البيت».
حكايات محكمة الأسرة..سيبتله البيت عشان بيخوني
تابعت «أماني» حديثها قائلة: «لحد ما اكتشفت انه بيخوني لما سمعته وهو بيكلم ستات في التليفون، وقتها سيبتله البيت ورحت عند أهلي ومن ساعتها مرجعتش تاني، الأهالي حاولوا يصالحونا ودي لكن هو اللي رفض يرجعني تاني وبقى مبيسألش في ولاده ولا فيا، وحتى المصاريف بيبعت شهر اه وشهرين لا».
قضايا محكمة الأسرة..رافعة القضايا عشان يرجعني
أنهت «أماني» حديثها قائلة: «اللي خلاني أجي المحكمة كان عشان أرفع عليه قضية النفقة عشان اضغط عليه ويرجعني، أنا كنت عايزة اعيش واربي عيالي وابقى في بيتي لكن كل ده محصلش، متأثرش ولا عمل حاجة لما عرف بالقضية، وبقالي 6 شهور سايبه البيت، ولما مسألش فينا تاني جيت أرفع عليه زيادة نفقة يمكن وقتها يتعظ ويرجعني ».
تابع أحدث الأخبار عبر
