أخبار محكمة الأسرة
محكمة الأسرة.. شادية: مبيشتغلش ولا راضي ييسبني اشتغل وقاعد في البيت
قصدت «شادية» محكمة الأسرة بعد حياة صعبة لم يكن في قدرة أي شخص تحملها، وبالرغم من ذلك عاشت الزوجة وتحملت لرفضها فكرة الطلاق وخوفها من كلام الناس عليها لكن ما وصلت له أنها كرهت حياتها وكانت ستخسرها في وقت من الأوقات مما جعلها تهرب في النهاية لمحكمة الأسرة حتى تنهي أزمتها وتحصل على حريتها برفع دعوى خلع.
قصص محكمة الأسرة..شفت معاه كل أشكال البهدلة
قالت «شادية» في بداية حديثها: «أنا متجوزة من 2011 جواز قرايب من بعيد، رافعة على جوزي قضايا من سنة فاتت وسايباه بقالي سنتين، الحياة مع جوزي كانت صعبة جدا من زمان شفت كل اشكال البهدلة، ضرب وإهانة وقله مصاريف واستحملته كتير على أساس في يوم يتعدل عشان خاطر ولاده لكن مفيش فايدة».
دعاوي محكمة الأسرة..بيخليني استلف من أهلي غصب عني
أكملت «شادية» حديثها وقالت: «كان بيشتغل في السياحة وبيقعد في الشتا في البيت عشان قله الشغل وحتى في الصيف كان بيشتغل يومين ويقعد قصادهم أسبوع، كان بيبقى عايز فلوس وانا مبشتغلش لأنه رافض يخليني اشتغل ولما اطلب منه فلوس للبيت والعيال يقولي اتصرفي كنت باخد من أهلي بس بعد كدة حسيت اني تقلت عليهم، لو طلبت انزل اشتغل عشان اكفي البيت والعيال يضربني ويبهدلني ».
حكايات محكمة الأسرة..مقدرتش اتحمل الضرب والإهانة
تابعت «شادية» حديثها قائلة: «مكنتش راضية اسيبه واطلق عشان خايفة من كلام الناس، بس سيبته لما زهقت منه من كتر الضرب والإهانة كنت بقدر اتحمل الشتيمة والزعيق والخناقات لكن الضرب كان كتير وصعب كان بيضربني ويهني طول الوقت عشان عايز فلوس، وهو مكنش بيتعدل كل مادى بيزيد في طبعه وبهدلته ليا ».
قضايا محكمة الأسرة..محاولش يرجعني غير مغصوب
أنهت «شادية» حديثها قائلة: «حاول يرجعني مرة واحدة بس من ساعة ما سيبته ومكنش جايلي أصلا كان جاي لبنت عمه في فرحها واخواته غصبوا عليه عشان يجي يشوفني ويطلب مني أرجع، مرديتش ارجع لأنه مكنش عايز يحل كان عايز يرجعني ونفضل على الحال اللي احنا عليه، رفضت ارجع للعذاب ده وجيت ارفع عليه قضية نفقة عشان ابني وبنتي اللي مبيسألش فيهم دول ».
تابع أحدث الأخبار عبر
