أخبار محكمة الأسرة اليوم
عندك المحكمة روحي اشتكيني.. سارة لقاضي الأسرة: سايبنى زى البيت الوقف
زوج سارة دفعها لتتوجه لمحكمة الأسرة بسبب أفعاله ورفضه أن يتقي الله فيها وبالرغم من رفضها الوصول لهذه النهاية لكنها كانت مضطرة بسبب أفعاله الصعب احتمالها وأخلاقه السيئة أن تأخذ هذا القرار وبعد طلبه منها أن تتوجه لمحكمة الأسرة لأنه يحل بشكل ودي، رفعت عليه قضايا لتستطيع أخذ حقوقها ما وجدته منه كان مثل المعتاد الإهانة وعدم الإحترام لها أو تقديرها.
قضايا محكمة الأسرة..كنت فرحانة عشان هيبقالي بيت وأسرة
بدأت «سارة» حديثها وقالت: «أنا متجوزة بقالي 8 سنين، خلفت من جوزي ولد واحد بس أول ما اتجوزنا، أول ما جوزي اتقدملي كان شخص مناسب جدا ولما سألنا عليه طلع أهله ناس كويسة ومحترمة وده اللي خلاني وافقت عليه، كنت فرحانة إني هتجوز ويبقالي بيت وأسرة».
دعاوي محكمة الأسرة.. المشاكل كانت كتير في أول الجواز
أكملت «سارة» حديثها وقالت: «في أول سنة جواز الدنيا كانت ماشية كان فيه بينا مشاكل الأول كانت عادية لكن بعد كدة بقى يغلط كتير ويشتم ويزعق، كانت الخناقات تهدى شوي وتزيد شوية وكنت بروح عند أهلي لما يحصل مشكلة وهو كان بيرجعني وفضل الوضع كدة لحد ما حملت في ابني».
حكايات محكمة الأسرة..مرضيش يرجعني البيت تاني
تابعت «سارة» حديثها قائلة: «كان بيخيل جدا ومبيصرفش مكنش كدة في الأول لكن بعدين اتغير وبقى واحد تاني، مكنش بيرضى يديني فلوس اكشف حتى، ومهما اتكلمت معاه وحاولت افهمه مفيش فايدة، لحد أخر مرة كنت تعبانة ورحت للدكتور عشان اكشف وطلب مني ارتاح، قعدت عند أبويا عشان هو مش راضي يصرف ابويا كلمه وقاله هترتاح عندنا يومين قاله خليها عندك على طول انا مش عايزها ومتدخلش الشقة تاني».
قضايا محكمة الأسرة.. مش راضي يطلقني أو يرجعني
أنهت «سارة» حديثها قائلة: «حاولت أكلمه كتير عشان يرجعني ويسبني أرجع البيت تاني لكنه رفض، ولما طلبت منه مصاريف للولد ومصاريف ليا وأنا حامل رفض يديني أي حاجة وقالي عندك المحكمة روحي اشتكيني، ولما لقيت مفيش فايدة معاه ومش هيتعدل جيت المحكمة عشان أرفع قضية نفقة عليه ولما عرف اتصل بيا شتمني وبعد ما رحت المحكمة بسببه بيقول اللي بيروحوا المحكمة دول شمال ومش راضي يطلق ولا راضي نرجع».
تابع أحدث الأخبار عبر
