أخبار محكمة الأسرة
محكمة الأسرة.. هالة في قضية خلع: هانت عِشرة السنين وبيخوني مع ستات النت
كانت هالة في محكمة الأسرة عيونها ممتلئة الحزن والألم بسبب زواجها الذي بني على قصة حب لمدة 15 عامًا وانتهى بسبب نزوات الزوج الذي لم يقدرها أو يصونها، بعدما اكتشفت الزوجة خيانات زوجها قررت أن تتركه حتى تحفظ كرامتها التي لم يصونها زوجها، ولكن بدل أن يحاول أن يصلح علاقته بزوجته حرمها من أولادها بعد طلبها الطلاق منه، ولم يترك لهالة حل سوى أن تتوجه لمحكمة الأسرة حتى تحصل على حريتها وتستطيع أن تكمل حياتها مع أبنائها.
قصص محكمة الأسرة.. اتجوزت بعد قصة حب 15 سنة
قالت «هالة» في بداية حديثها : «أنا وجوزي اتجوزنا بعد قصة حب دامت 15 سنة، خلفت منه ولد وبنت، والحياة كانت ماشية و كويسة ومفيش مشاكل، حتى المشاكل بينا كانت عادية والمشاكل بتتحل بينا عادي زي اي اتنين متجوزين».
حكايات محكمة الأسرة.. بيخوني مع ستات من على النت
تابعت «هالة» حديثها قائلة: «لحد من قريب المشاكل بيني وبين جوزي بقت أكتر من الأول مكنتش فاهمة في ايه بس كنت عارفة انه متغير معايا ومش زي العادي، بقى على طول ماسك التليفون وبيتكلم فيه ومبيعدش معانا مع انه مكنش بيعمل كدة الأول، لما دورت وراه لقيت انه بيخوني ويعرف عليا ستات كتير بيكلمهم على النت».
دعاوي محكمة الأسرة.. اديته فرصة وخاني تاني
أضافت الزوجة: «لما واجهته قالي مش هعمل كدة تاني، ولأني بحبه صدقته واديته فرصة لكن بعد كدة لقيته متغيرش ورجع زي الأول على طول قاعد على التليفون ،لما واجهته المرة دي قالي اه بخونك واعملي اللي انتي عايزاه، سيبت البيت ورحت عند أهلي وطلبت الطلاق على طول».
قضايا محكمة الأسرة.. أخد العيال عشان يعاقبني إني طلبت الطلاق
أنهت «هالة» حديثها قائلة: «دلوقتي هو رافض يطلقني أو يخليني أشوف ولادي خدهم مني وحرمني منهم عشان يعاقبني إني طلبت الطلاق، جيت المحكمة عشان ارفع قضية خلع وضم عشان أخد العيال ويبقوا معايا وهو انا مش مصدقة اللي عملوا معايا بعد عشرة السنين دي كلها».
تابع أحدث الأخبار عبر
