أخبار محكمة الأسرة اليوم
محكمة الأسرة وحكاويها.. هيام: نزلت عيالي يشتغلوا عشان نلاقي ناكل
لجأت «هيام» لحل محكمة الأسرة لتحاول أن تجد الأمان والاستقرار في حياتها بعد حياة عاشتها مع زوجها ملأها الألم والحسرة بسبب بخله وقسوة قلبه على زوجته وأبنائه، بدلا من أن يكون سندهم وحمايتهم في الدنيا، واضطرت الزوجة بسببه أن تتوجه لمحكمة الأسرة حتى تحصل على حقوق أولادها من والدهم.
قصص محكمة الأسرة.. المشاكل مع جوزي زادت بعد الخلفة
بدأت «هيام» حديثها: «أنا اتجوزت من 15 سنة وخلفت من جوزي بنتين وولد، اتجوزته جواز تقليدي شافني وأعجب بيا واتقدملي، الدنيا كانت طبيعية في الأول وكان مفيش مشاكل بس من بعد الخلفة المشاكل بدأت وكل مادى كانت بتزيد ومبتقلش».
حكايات محكمة الأسرة.. بيطلع عيني عشان يصرف الجنية
تابعت «هيام» حديثها قائلة: «سنين عيشت معاه وكانت أكبر مشكلة بينا على المصاريف، كان بيطلع عيني عشان يصرف جنية واحد وحاولت معاه كتير إنه يتعدل لكن مفيش فايدة اللي في دماغه في دماغه والمشاكل كانت كتيره بسبب الموضوع ده، كنت بتصرف وبستلف عشان الدنيا تمشي لكن كل مادي الوضع كان بيبقى أسوء».
دعاوي محكمة الأسرة..جوزي رفع السكينة على ابني
أضافت الزوجة: «اتحملت كتير عشان مليش حد في الدنيا لحد ما تعبت منه وقررت أسيبه بعدما شفت معاه الويل من ضرب وإهانة وبهدلة، خفت يعمل فينا حاجة لو فضلنا معاه بالذات لأن لما جيت أخد هدومي رفع سكينة على ابني عشان ميسبناش نمشي وهددنا إنه مش هيسبنا في حالنا، عنده استعداد يعمل أي حاجة عشان محدش ياخد منه فلوس ويطلع مظلوم».
قضايا محكمة الأسرة.. حياتي أنا وولادي اتدمرت
أنهت «هيام» حديثها قائلة: «جيت أرفع قضية نفقة عليه أنا كنت خايفة منه الأول عشان كدة مرفعتش، لكن حياتي أنا وأولادي اتدمرت اضطريت اشغل عيالي عشان أقدر ألاقي مصاريف بعد ما سيبته، بنتي الصغيرة نفسيتها تعبت كانت بتقوم من النوم منهارة من العياط وبتقولي إيه اللي وصلنا لكده بقينا نايمين على مرتبة في شقة مفيهاش حاجة خالص صعبوا عليا وجيت عشان أقدر أخد حقهم اللي هما يستحقوه».
تابع أحدث الأخبار عبر
